肥姐沈殿霞前晚雖因為剛做完化療而缺席《歡樂今宵團圓夜》，但欣宜昨日在《志雲上素》中透露肥姐情況好轉，她又說：「媽咪間中仲有偷食，最近鍾意偷食薯片。」欣宜更大爆肥姐已做了一件粉紅色戰衣出席下周六《萬千星輝頒獎典禮》，在螢光幕跟觀眾見面。
鄭欣宜昨日在銅鑼灣接受陳志雲主持的《志雲上素》訪問期間，揚言待媽媽沈殿霞康復後，會與她到星馬泰游水及吃個飽，欣宜又說：「媽咪最近好乖，食嘢自動自覺減少少，但間中仲有偷食。媽咪最近鍾意偷食薯片，屋企包包都開過，但薯片唔係我買，我唔係魔鬼。」
「我唔係二世祖」
談到肥姐病情，欣宜說：「媽咪最近做咗化療，因為藥嘅份量減少，所以治療時間長咗。我同大家講個好消息，媽咪體內冇晒啲壞細胞，做化療只係以防萬一。媽咪化療時，試過一種藥有敏感，醫生話有敏感可以打敗啲壞細胞。17號台慶頒獎禮，媽咪整咗條粉紅色戰衣，雖然媽咪做完化療之後好攰，最耐係攰成個星期，但相信17號媽咪狀態會好好。」欣宜無形中透露肥姐將於下周六亮相《萬千星輝頒獎典禮》，接受「萬千光輝演藝大獎」榮譽。問欣宜在節目中有甚麼上訴時，她說：「希望大家放低對我先入為主嘅印象，當我全新人，我唔係靠父蔭或母蔭嘅二世祖，面對呢啲咁嘅事，我唔會開心，但我學識自嘲。」
父女兵顯溫馨
至於欣宜前晚在九龍灣錄影明晚播出的《歡樂今宵團圓夜》，無綫筵開33席宴請一班EYT老臣子，包括狄波拉、吳君如、曾華倩、林建明、森森、斑斑、俞子明、溫柳媚和仙杜拉等等，但昔日台柱何守信和盧海鵬均不見影蹤，而除汪明荃要出席八和就職禮外，肥姐又因為剛做完化療後身體不適缺席，以及未能打電話到現場打氣，令團圓夜變得有點美中不足。
鄭少秋與鄭裕玲及崔建邦任節目司儀外，更與欣宜合唱一曲《天涯孤客》，會場並播出肥姐昔日在ETY演出的片段，二人演唱完畢後，秋官更錫了欣宜一啖，場面倍覺溫馨。
採訪、攝影：魯萍、卓寶花、陳志嵐
爆笑小八卦：盧大偉玩謝曾華倩
當年以食字gag出位的盧大偉（左圖），前晚在《歡樂今宵團圓夜》中大顯搞笑本色，他走上前問梁朝偉昔日女友曾華倩（右圖）：「梁朝偉拍《色，戒》係飲乜嘢飲品犧牲色相？」其時曾華倩笑說：「係我叫佢拍嘅。」盧大偉繼而問張兆輝，始知答案原來是「楊（陽）枝甘露」，引得全場捧腹大笑。
