佘詩曼去年獨攬無綫台慶頒獎禮兩大女主角獎項，成為香港電視史上最威水視后，今年她憑《東方之珠》的黐脷筋歌女角色，單挑《溏心風暴》的至尊孖寶李司棋和關菊英；面對兩大勁敵，阿佘指前者壓場感十足，後者則具擦火花奇功，故她直言自己不會每次都一個人好晒，反而「全力支持大細契！」
無綫劇集《溏心風暴》今年威到盡，在下月舉行的台慶頒獎禮上獲最多提名，風頭一時無兩，大契李司棋和細契關菊英更雙雙成為最佳女主角及我最喜愛的電視女角色頂頭大熱，就連去年憑《鳳凰四重奏》中一人分飾四角獨攬此兩獎的視后佘詩曼，也不得不對大細契寫個服字。
「司棋姐好勁」
其實阿佘今年也憑《東方之珠》中飾演的黐脷筋歌女朱玉蘭，入圍角逐台慶女主角獎項，但面對大細契兩大熱爆勁敵，日前阿佘接受訪問提及攞獎信心時說：「我全力支持大細契！之前我放咗一個月假，去夏威夷探媽咪，煲晒成套《溏心風暴》，真係感受到套劇好有張力，好有人情味。司棋姐好勁，好有壓場感覺，同菊姐撞起嚟，好有火花。」
阿佘續說：「《東方之珠》係舊年播嘅劇，唔係好着數，觀眾可能唔太記得。」問阿佘會否打定輸數？她說：「冇理由一個人好晒嘅，舊年我都好開心，今年我會係平常心，冇壓力，識得欣賞人哋嘅作品係好事。」
對新劇有信心
雖然阿佘只得《東》劇入圍台慶，但她夥陳小春和謝天華主演的另一齣台慶劇《鐵咀銀牙》周一首播，不過《鐵》劇不入今年頒獎禮，留待明年競逐獎項，對此阿佘笑說：「最緊要觀眾鍾意就得，我對呢套劇有信心，有輕鬆搞笑又有查案，我係做一個口才好叻嘅女仔，同演蝦蝦霸霸惡爺嘅陳小春係鬥氣夫妻，成日嗌交，都幾好笑㗎。」
採訪：朱倬誼
攝影：陳慧安
服裝：SistyrMoon
場地：香港富豪酒店
