記者Ｌ係廸士尼樂園大擁躉，自細就鍾意高飛狗，密密收集高飛狗卡通公仔。上星期六係記者Ｌ嘅大喜日子，下嫁電力公司公關Ｙ，請飲嘅地方竟然係廸士尼樂園酒店。左丁山問：「遠唔遠啲呀？」記者Ｌ十分細心，立即上網下載地圖送過嚟。
於是星期六跑馬之後，自沙田馬場揸車去廸士尼，沿途完全冇交通燈，三十分鐘內沿住地圖路線就去到廸士尼樂園酒店停車場。左丁山都係第一次去廸士尼啫，發覺樂園酒店區地面竟然如此廣闊，靠街燈都可以見到道路兩旁大量林木，好似去咗外國咁，不禁讚嘆香港建設何其妥善也。
入到酒店，首先恭賀新郎新娘一番，與新人影相後，走出「睡公主」宴會廳，周圍參觀吓，只見娛樂室內八張麻將枱啲麻將原封未動，原來大批到賀朋友趁機在下午入咗廸士尼樂園，睇完八點煙花騷先至嚟酒店飲，故此冇人打牌。記者Ｌ與新郎Ｙ嘅結婚相片已經有得睇，二人在廸士尼內拍攝大量照片，以「城堡」及「卡通人物」為背景，再在樂園內由律師做證婚人，唔怪得一位女士話：「Ｌ與Ｙ聯婚，果然係童話式婚禮。」
記者與公關結婚，係唔係因工作認識而結合呢？唔係，據婚宴司儀講，記者L與公關Ｙ係樹仁新聞系同學，在學生宿營時認識，自此Ｙ暗戀Ｌ，但Ｌ儍儍哋，唔過電，直至第二年，記者Ｌ去咗美國一個月，住在親戚家裏，畢業後在《蘋果》做記者嘅學生Ｙ居然有辦法搵到記者Ｌ美國親戚嘅住址，一口氣連寫二十八封信過去，令記者Ｌ徹底融化，返到香港就正式開始拍拖嘞。呢段追求故事，帶有童話色彩，今時今日之青年男女，極少靠情信開展破冰之旅嘅啫！
公關Ｙ去年在廸士尼樂園酒店求婚成功，一年後擺酒，畀新娘一個驚喜，就係在食完當紅炸子雞之後，安排咗高飛狗在廸士尼式音樂響起之下，昂然進場，上台與一眾賓客輪流拍照，左丁山去過好多婚宴，認為記者Ｌ與公關Ｙ之婚宴最別出心裁，人生本是一場戲，結婚時按照童年夢想，玩到賓主盡歡，場戲更添色彩。