個人另類心水，近年港產片最寫實電影，首推彭浩翔《AV》，麻甩仔飽食終日無所用心，圍威喂拍AV，終極志願一親女角香澤，比起《色，戒》中王力宏又愛又唔愛，麻甩仔的開門見山看得人身心舒暢，起碼死少一個王佳芝。
所以當我接過手頭這本絕非達人、而是新米（日文漢語，新丁之意）初試的《an'cos》，揭開頁頁Cosplay寫真，捉女仔去沙灘影相問人「鍾意睇乜嘢電視節目」，如此堂而皇之宣示麻甩品味，作為女仔，我都忍唔住追睇。
記者：劉嘉蕙
攝影：周旭文
《BirthNote》真人漫畫囗創刊心路
餵飽荷爾蒙過盛𡃁界港男
行家識貨，上月訪問報紙檔，叫看檔姐姐朱記介紹近日心水新書，佢指住本美少女封面雜誌，「有真人扮漫畫好搞鬼！」
搞鬼雜誌大名《an'cos》，106頁粉紙印刷，18蚊本，封面號稱「香港首本Cosplay情報誌Plus青年人雜誌」，但睇勻全本，以朱記及小記心頭好「真人漫畫」最搶，30版漫畫分鏡真人演繹，港大取景，模特兒整色整水扮鬼上身故事，實驗性十足，怪雞自有怪雞趣味。
自命貼地雜誌
一本雜誌兩個主腦，子夜與杜明同樣是25歲電車男，本來一個在上海搞IT業務，一個畫公仔，遇上印刷廠老闆揼本搞年輕人雜誌，幾個電車男夾手夾腳炮製第1期《Boom》，自稱「是一本非常貼地（所謂downtoearth）兼瞄準荷爾蒙過盛的年輕港男口味而發射的雜誌」，專攻麻甩仔興趣，替電車男改頭換面、撩靚女吹水，副研漫畫及Cosplay文化，印數1萬份，不過反應一般。熱愛Cosplay文化的子夜（佢強調只係欣賞，冇Cos埋一份）決定重整路向，第2期大刀闊斧改名《an'cos》，係鎮刊漫畫名《天使夜》加Cosplay二字撮埋咁解，加強Cosplay文化部份，教Cosplayer化妝，講解術語，集中報道本地Cosplay活動花絮。
「短期目標希望5期內成形，有公司落廣告。始終香港Cosplayer得幾千人，不能期望銷量太高。希望可凝聚Cosplayers，搞會員制。」名字有漫畫味的責任編輯子夜說。雜誌初期定為月刊，不過編輯部成員來來去去，現在走剩兩個人，《an'cos》10月號不知不覺無出到，月刊變雙月刊，11月號還在展望中。
「可能係Lolita，可能係扮Lolita」
財政問題有幕後老細撐腰，讀者迴響卻叫他們頭痛，「Cosplayer要求很嚴，真人漫畫被投訴到坼天，彈故事無聊、又彈Model有樣無心。」Cosplayer執着精神純潔，對於模特兒無媒苟合Cosplay大為反感，「讀者話Cosplayer玩玩吓俾人發掘做Model就得，因想做Model而Cosplay就唔得。」他們有個欄，介紹Lolita衣着又被怒插界定唔清晰，令人以為Cosplay即係Lolita。咁其實分別係乜？「譬如你見到個Lolita，有可能係佢鍾意將Lolita衫當Fashion着，有可能係Cosplay緊一個Lolita，出於對個角色的愛……係難分㗎，內行人先識分，但Cosplayer其實好少Cosplay出街，所以如果喺街上見到Lolita，應該係真嘅Lolita，唔係Cosplayer。」Cosplay邏輯果然精密！
角色扮演好自戀？
Cosplay讀者打架，編輯又打，雜誌改行Cosplay路線，原來兩個腦未傾好，負責雜誌中所有漫畫部份的美術主筆杜明更直言不能理解Cosplay文化，「Cosplay精神話要表達對角色嘅愛，但係點解愛一樣嘢就要變成佢？咁咪好自戀？成日話街外人唔了解佢哋，根本就係佢哋小圈子。」雜誌有正反兩面思維衝擊，不是壞事。「結果佢有佢做，我有我做，冇人幫，好辛苦，好睇唔好做呀。」請人，一定大把人應徵，「冇錢，好多稿都係朋友義務幫手做。」杜明說。二人都沒有雜誌編採經驗，邊做邊學，憑空摸索，出到兩期，可算奇迹。
囡囡起底 Lolita講Lolita
Asa與布冧是Lolita，不是CosplayLolita，「人哋唔識分無所謂，等於我見人着鬆身衫褲，都以為係HipHop，可能人哋未必係，自己開心就得。」本身從事文職的Asa說。Lolita最愛蒲點，包括廸士尼酒店，「因為Lolita喜歡嘆英式下午茶，廸士尼又有古堡味。」布冧13歲，儲幾年錢買下Lolita服過癮，拍攝全程嫲嫲跟場，睇乖孫擺甫士，證明老少咸宜。
後記即係媾唔到女呵？
扭擰多無謂，麻甩仔整麻甩書，記者直擊採訪現場，女仔個個短裙仔，最重要一條問題，我唔問，一定俾人覺得我冇寫過嘢。
問：「媾到女嗎？」
答：「你話呢？」
問：「……」
答：「又唔知人哋有無男朋友。」
再答：「呢個笑起唔靚。腳又粗。」
意猶未盡：「呢個最靚但係脾氣差。」
明晒！
專業講評
內行讀者羽翼司 值得嘗試
「本雜誌我畀70分，可以加強資訊部份，不過以香港市場計，都算係好嘗試。」
報章編輯彩記跌價先入
「我覺得幾好，賣$10會考慮（現售$18）。封面標題字太細，影相唔好白衫黐白地……出完創刊號就改名有啲搞笑。」
日本通Lily 仍須努力
「幾有誠意，不過印刷質素麻麻，單憑封面唔知佢做乜，一句講晒，仍須努力。」
