曾司長到中大演講，不知現場學生反應如何，曾司長話中大係「虎穴」，佢自己唔怕。其實任何人到任何大學演講，都係身入虎穴，但唔好以為啲大學生會咬人，會發問尖銳問題，令講者好難堪喎。名人最怕者，係學生坐在台下，自說自話，互相傾投資，傾功課，甚至傾八卦，都費事聽你在台上講乜。學生以為自己細細聲，台上聽唔到，怎知道大禮堂（例如中大逸夫堂）嘅收音系統極佳，台下蚊滋咁細聲都好啦，正是聚蚊成雷，台上嘉賓會聽到非常之唔自然。一位老外用英語演講，台下學生無心裝載，就出現台上台下各說各話嘅場面。事後老外寫信去投訴，一場大好演講，變成彼此尷尬。
學生聽演講冇禮貌，甚至怪責演講嘉賓「冇料到」，「講說話死板」，「聲音單調」，「佢out咗嘞」，總之係講者嘅錯，唔係自己有問題。因是之故，負責搞演講會之辦事人，視邀請嘉賓為苦差，你估次次請到嘅嘉賓都係曾司長之類嘅大人物，或者丁新豹呢類講歷史掌故娓娓動聽嘅人物咩。
我哋在不少社交場合聽演講，亦有呢啲事情發生，譬如在酒會，主人家致詞，主禮嘉賓致詞，往往講到一幅被咁長，台下賓客一樣各自傾偈，彼此尷尬。公關大姐大每次安排酒會，往往堅決要求致詞人士上台講話不超過三分鐘，但係發表談話之人，往往就是付鈔之人，佢揸住個咪唔放，邊度有人敢叫佢「下台」呀？另一類人如電視、電台主持做司儀，如果冇事先指示，佢哋就以為係自己嘅騷，講嘢仲多過主禮人，同樣令台下之人不安！
非特大學生，成年人嘅注意力亦係好短暫，十五分鐘之內就失去耐性，冇心機聽人講嘢，除非佢係做緊棟篤笑或者畀冧巴（例如黃師傅講三八八、九四一）。各位有頭有面嘅老友，你哋到任何大學演講，最好簡而清，每三五分鐘有一個gag位，講吓笑話，不妨請林超榮度埋橋！入大學如入虎穴，不無道理，自問唔係武松者，最好唔去。好似牟宗三以山東國語在台上講足個幾鐘頭而台下無人識聽，無人敢出聲嘅場面，早已成為集體回憶。