「點先叫做真正識食蟹，第一，要凍食；第二，點我特製嘅蘋果醋；第三，用手食，咁就VeryGood！」從事飲食業接近廿年嘅魯文海，中西日咩菜都識，今時今日反而返璞歸真，主攻蒸蟹。魯師傅話：「食材有幾千種，只有蟹我覺得係最鮮、最甜！蒸完雪凍，蟹味最正。香港人好嘴刁，即使食物新鮮，但發揮唔到佢嘅原汁原味，都好難留住啲客。」食咖喱蟹，只係食到咖喱味；食避風塘炒蟹，食嘅係加入蒜辣味嘅蟹肉，只有用蒸，先至可以做到原汁原味！
「食蟹唔可以急，一急就食得唔徹底，品嚐唔到蟹嗰種帶鹹嘅天然鮮味！」喺香港食外國蟹，唔係酒店就係高級西餐，價錢貴又要顧儀態，故魯師傅決定開食蟹快餐店，將外國蟹大眾化，客人可以用手大啖大啖咁食，享受蟹嘅原始美味。
眾多嘅外國蟹中，邊種蟹最受歡迎？「加拿大蟹同法國麵包蟹係最受歡迎，加拿大蟹肉質甜美；法國麵包蟹膏實味濃，價錢合理！」煮蟹其實好簡單，將新鮮嘅蟹蒸完放入雪櫃就得，咁先嗒到蟹嘅最原始鮮味，你又識唔識食呢？
記者：洪偉順
攝影：陳陶鈞
法國麵包蟹 每隻$168起
因顏色似法國麵包，故稱麵包蟹。蟹膏味濃有嚼勁。
加菲蟹 每隻$160起
原產地澳洲。肉質鮮白幼嫩，鮮甜無比，入口即溶。
加拿大蟹 每隻$188起
跟加菲蟹一樣，肉質幼嫩鮮甜，較有口感。膏多味濃，一啖吮落去最正。
海鳳棧（25627486）
地址：鰂魚涌英皇道692號地下