正義聯盟蝙蝠俠駕臨香港，fans呢幾日望穿秋水希望見到呢位神秘人真身，可惜香港地少人多，維港又污染嚴重，搞到呢位遠道而來取景嘅英雄唔可以喺鬧市大顯身手，更加唔敢跳海搵命博，之不過港人最曉轉膊，東方荷李活唔係浪得虛名，既然荷李活編劇罷工，八方一於幫手度劇本，開拍蝙蝠俠外傳時用得着。
踏上歧途有苦衷
蝙蝠俠係正義朋友，環顧香港，足以同佢匹敵嘅對手相信僅葉劉一人，呢齣《蝙蝠俠大戰百變掃把頭》（暫名）第一場就係床上戲！話說葉劉喺柴灣公屋留宿，夜半無人，傳來隆隆地鐵列車噪音，佢瞓喺床上思潮起伏，回想當年推行23條時對住香港人副嘴臉，真係百感交集，難怪陳太要求換人，不過上頭有令……
蝙蝠俠戲中個個反派都有走上歧途苦衷，好多人認為葉劉呢次重出江湖，就係為一雪當年黯然下台之恥，事實係點，留待下回分解。而戲中第二幕，畫面一轉就去咗港大陸佑堂，聽日葉劉就會喺度同陳太首度交鋒，《色，戒》都喺陸佑堂攞過景，蝙蝠俠喺度拍動作場面一流。
兩太喺選舉論壇碰頭，葉劉肯定法寶盡出，佢係咪真正支持2012雙普選，可能迷離過謎語人，屆時一定要佢從實招來，如果佢用掃把頭出招，蝙蝠俠就用地拖棍還拖，為咗增加本土特色，八方建議蝙蝠俠出動新武器，最能夠代表香港嘅，梗係「咖喱魚彈」啦，等荷李活觀眾都見識吓呢種正嘢。
荷李活電影中，身懷奇技角色好受歡迎，急凍人都好多擁躉，若然葉劉玩嘢急凍民主步伐，蝙蝠俠梗要掟飛鏢對付佢。蝙蝠形飛鏢好常見，成日用稍欠新鮮感，如果要改用新款，八方熱烈推介熱辣辣出爐香港特產老婆餅形飛鏢，喺老婆餅上印個蝙蝠標誌，真係潮到唔捨得食！
陳太勸改邪歸正
邪不能勝正，呢場大戰結果如何，不必八方細表，齣戲到尾聲，最後一場戲，陳太都係時候出場，正路應該係陳太勸人改邪歸正，以消港人心頭怒氣，但為方便拍續集，都係含含糊糊，影住葉劉同陳太對望就算。選舉形勢峯迴路轉，其他六個陪跑嘅茄喱菲喺片末，亦人人有個大特寫鏡頭，最終回12月2號有分曉。如果呢個劇本俾人睇中開戲，八方承諾唔收錢，幫我捐晒畀蘋果基金啦。