阿里巴巴（1688）成為新股王，帶挈抽中嘅散戶賺到笑，噚日阿里巴巴最高見過39.95銀，勻真啲用收市價39.5銀計，抽中一手500股，賬面賺萬三蚊。不過，散戶都未算大贏家，對於主席馬雲嚟講，呢鋪都算代表作，賬面身家升值唔單止，仲贏埋名聲，但講到阿里巴巴最大贏家，除咗馬雲，應該仲有Yahoo。
電郵：mailto:[email protected]
馬雲贏名聲
先講創辦人兼主席馬雲，究竟喺今次上市賺咗幾多錢華華計唔掂，因為喺招股書度，只係披露咗阿里巴巴集團嘅持股量，而阿里巴巴集團係由Yahoo、Softbank、阿里巴巴管理層同其他股東一齊揸住嘅，唔計Yahoo同Softbank，淨係計馬雲一班管理層同其他股東，以行使超額配股權後計，就揸住上市嘅阿里巴巴約12.9億股（25.5%），以噚日收市價計，價值510億銀。
撇除大股東Yahoo，喺阿里巴巴上市前，台灣首富、鴻海精密郭台銘用咗2.7億港銀，認購二千幾萬股，以噚日收市價計，賬面獲利5.2億銀。香港富豪亦都有捧場，糖王郭鶴年、九倉（004）吳光正同新地（016）郭氏兄弟，都分別用咗2.3億銀，認購大概1700萬股阿里巴巴，賬面獲利4.5億銀。其他嘅基礎投資者仲包括AIG、思科系統同工銀亞洲（349）三間公司。
雅虎港美兩邊賺
講到最大贏家，非雅虎（Yahoo）莫屬，佢早喺05年以作價約125億港銀（包括真金白銀10億美金，同注入雅虎中國嘅中國業務估值6億美金），買咗當時仲未上市嘅阿里巴巴40%股權。另外，今次阿里巴巴上市，佢亦以基礎投資者身份透過國際配售，斥資7.76億銀認購咗5748萬股。
若計埋配售分到嘅，Yahoo持股量接近三成三，係阿里巴巴最大股東，持股量16.5億股，以噚日收市價計，呢批股份值651億銀。嗱，華華簡單啲嚟睇，單計Yahoo喺05年入股同今次認購，兩鋪拎出嚟嘅成本132.76億銀，賬面賺咗近4倍。再簡單啲，單係今次國際配售認購番嚟嘅，賬面都賺近15億銀。
咁仲唔止，受惠阿里巴巴上市，Yahoo喺美國嘅股價自10月以嚟，升咗16%。至於第三大股東日本Softbank都唔失禮，佢公司持有約12億股阿里巴巴市值亦達472億銀。
兩萬蚊人仔創業
個子瘦小嘅馬雲，2000年曾「透露」自己只有45公斤（大概99磅），今日馬雲體重有冇增加，華華唔知，但佢副身家肯定重咗好多。雖然話英雄莫問出處，但當英雄做咗富豪，咁就唔同。
馬雲1964年杭州出世，同其他互聯網精英唔同，佢冇讀過一流大學，更加冇放洋留學，初中考兩次先上到高中，高中之後考咗3次先上到杭州師範學院，據講佢做過三輪車伕、苦力、賣報紙，仲去應徵做酒店服務生，但因為身高問題被拒。直至師範畢業後，喺杭州教英文同國際貿易。
佢嘅發達歷程，應該由95年開始，馬雲同老婆湊咗兩萬人仔，創辦專門幫企業做主頁嘅「海博網絡」，網站取名「中國黃頁」，成為大陸最早嘅互聯網公司之一。97年，中國黃頁營業額達600萬人仔，表現出色，馬雲獲外經貿部邀請加入中國國際電子商務中心信息部，創辦Infoshare，開發兩大商貿網站，包括中國商品交易市場網站，同中國外經貿部官方網站。99年佢返杭州第二次創業，創立以電子商貿為主嘅阿里巴巴網站。