講個秘密你哋知，小妹就快要嫁，𠵱家同男友諗緊去邊度度蜜月；生活易啲老友話，早前訪問咗700幾個已經訂婚同結咗婚嘅孖公仔，問佢哋會揀邊度honeymoon，原來最多港人揀嘅地方係東京，其次係北海道，巴黎第三。
冬天去日本度蜜月，真係好浪漫；小妹都想去日本，東京定北海道，十五十六，都係問吓國際漫遊協會嘅日本通Frankie。
佢話講浪漫，東京就唔及得北海道，但東京勝在啱女仔shopping；浪漫啲嘅景點，例牌嘅有東京鐵塔、廸士尼、台場等，最新熱點係東京巨蛋LaQua樂園嘅摩天輪。佢建議新婚夫婦去東京玩，應該去埋箱根嘅溫泉酒店，喺房入面赤條條浸溫泉。
Frankie話，講到溫泉酒店，北海道真係多不勝數，有幾浪漫有幾浪漫，其中一間喺小樽嘅宏樂園溫泉旅館，都被香港人去到殘晒。佢提議可以去梁朝偉同劉嘉玲都幫趁嘅Tomamu度假村，滑雪浸溫泉；再浪漫啲去洞爺湖嘅溫莎酒店，房入面固然有得浸溫泉，仲有好大個窗望住出邊嘅湖景，「價錢係貴啲，一泊二食每晚每人都要千幾二千蚊。」
逢周一至周四刊出