現年25歲嘅03年四料港姐冠軍曹敏莉（Mandy），年頭俾本報記者拍得佢同方面平頭、貌似陳錦鴻嘅圈外男友拍拖，但上個月佢突然自稱失戀，點知轉過頭又俾人踢爆因為參加湖南《舞動奇跡》比賽，秘密同港男黃長興撻着，搞到黃長興個舊愛、有「友坂師妹」之稱嘅梁寶賢(Bibi）日前出席活動嗰陣，激動到哭訴情敵「姣其他男人，呢啲女仔絕對討厭！」而黃長興得知新歡被鬧也出言維護曹敏莉話：「咁對Mandy唔公平！」
拉同事落水
噚晚喺將軍澳電視廣播城撞到Mandy返去錄影，對於自己被指跟黃長興因《舞動奇跡》撻着，佢話：「如果要講《舞動奇跡》就係10個人，而唔係得我哋兩個人，係10個人一齊參加，當時一大班人好辛苦，互相鼓勵，我整親條腰，講嘢都痛，佢哋好照顧我。黃長興喺外國返，佢係好細心同浪漫，但唔代表我哋喺一齊。」
問到俾黃長興前女友Bibi力數佢，會唔會覺得唔開心，Mandy話：「咁睇到報道梗係唔開心啦，無端端俾人鬧，都唔關自己事。」問佢同黃長興有冇發展機會，曹敏莉話：「我啱啱讀完書返嚟，會畀心機做嘢，暫時唔會拍拖住，唔知點解件事會牽涉自己入去，一張相都冇影過，其實人哋戀情自己唔會畀意見，亦唔想involve入去。」問曹敏莉識唔識Bibi，佢話：「04年見過一次，佢當時參加TVBcovergirl選舉，我做評判，但就唔識佢。」
