馮仁昭四圍超:楊思琦解凍做妹仔 - 馮仁昭

馮仁昭四圍超:楊思琦解凍做妹仔 - 馮仁昭

無綫又再開拍一屋幾妻爭家產、爭老公同爭地位嘅古裝劇,名為《銀樓金粉》,由薛家燕(好姨)飾演嘅大當家,會同伍詠薇、陳秀珠同胡定欣爭老公秦沛,楊思琦扮演丫環。噚日大會仲安排思琦斟茶畀四位少奶,考驗佢做妹仔嘅能力。

秦沛唔恨齊人福

楊思琦俾無綫雪藏近1年後正式復工,好姨對此話:「我都兩年冇拍劇,唔可以用個雪字嚟形容,公司都唔係雪你,放心,最緊要自己努力。」思琦解凍後飾演低下層角色,佢話:「唔係,只係嘗試唔同角色啫,唔一定要高高在上嘅角色先有發揮,我唔會介意,扮醜都得㗎。」又話:「做妹仔真係第一次,平時人服侍我,𠵱家我服侍人,我同家燕姐比較多戲,做佢近身丫環,對上一次同家燕姐合作已經係01年。」
秦沛今次喺劇中一拖四,四位老婆仲為佢爭崩頭㖭,好姨即刻笑住話:「何生(指何鴻燊)食生日飯都要走4場㗎,你應該打電話畀何生,問吓佢同太太相處之道。」秦沛就話:「我就唔恨一拖四,4個女朋友都頂唔順啦,何況4個老婆。」

秦沛喺新劇入面一拖四,周旋喺胡定欣、陳秀珠、薛家燕同伍詠薇四房之間。

伍衛國同楊婉儀結片緣,唔知呢啤能唔能夠擦出火花?