最近個股市咁癲，令小妹諗起另一個冇乜理性可言嘅小提琴買賣市場，一個名家古董琴，可以賣幾千萬一個。小妹認識一位資深嘅從事小提琴買賣嘅朋友Andy，知道唔少行內嘅怪現象。
佢話港人買小提琴一係幫襯樂器行，一係搵提琴教師代勞。香港嘅提琴專門店唔多，較出名有HongKongStrings同OrfeoStrings，新舊提琴都有得賣，有埋維修師傅。信唔過佢哋惟有信老師，但Andy就叫人唔好輕信教師喎。
佢解釋話，唔係咁多教師認識提琴，識拉琴唔代表對提琴構造有認識。有名嘅樂器行勝在有訂價標準，價錢有個譜，私人教師視乎個人操守，有啲恃住學生信任，開天索價。
小提琴生產商大致分做三種，第一種係琴匠獨家人手做，第二種係幾個工人組成嘅小店，第三種係流水作業式嘅工廠。琴匠做嘅最貴，可以賣到20萬一個。但小提琴價錢同質素唔一定成正比，有時平嘢可奏出好嘅音色，幾千銀一個大陸貨都可以有好嘢。更高層次嘅係古董小提琴，意大利名家AntonioStradivari同GuarneridelGesu做嘅琴，就可以賣到幾千萬港幣一個。
逢周一至周四刊出