前港姐冠軍曹敏莉日前被踢爆因參加湖南《舞動奇跡》比賽，秘密同港男黃長興撻着，噚日黃長興前度女友、即有「友坂師妹」之稱嘅梁寶賢（Bibi）喺會展行婚紗騷，佢被問到舊愛嘅新戀情時好激動，句句有骨，矛頭直指曹敏莉。
「個人變咗心」
Bibi好嬲咁話：「其實我哋都分咗手一個月，之前拍咗兩年拖，係和平分手，上星期見到黃長興，佢都話同曹敏莉好夾，不過冇追佢。」當記者問到Bibi曹敏莉係唔係佢哋分手嘅導火線，Bibi話：「個人變咗心，我都有挽留過，咪吸取經驗做溫柔女友，我都有嬲佢哋，唔想指名道姓，係人都知佢有個圈外男友，行行吓𠵱家識咗另一個，本身都唔正經，絕對討厭。」
其實本報記者年頭曾發現曹敏莉同方面平頭、貌似陳錦鴻嘅圈外男士蜜運，之後曹敏莉承認戀情，上月忽然自爆失戀，同Bibi透露同黃長興分手一個月嘅時間好脗合，絕對有做第三者之嫌。
此外，黃長興細佬黃長發噚日同班港姐去烏溪沙出席活動，對於哥哥同曹敏莉嘅戀情，黃長發話唔知情，不過之前都試過同佢兩個出街，問到會唔會恭喜佢哋，黃長發話：「唔恭喜，唔應該拍拖，對我就冇所謂，不過公司好重視呢個問題。」
