賭王何鴻燊前晚出席保良局晚宴，跟蓋鳴暉合唱粵曲時，大改歌詞冧台下的四姨太梁安琪。賭王直指四姨太銷魂美麗不遜劉嘉玲，令四姨太笑逐顏開上台，女兒何超欣更獻花，場面溫馨幸福，其後四姨太指自己不及香港小姐漂亮，賭王即說：「佢一樣可以掃低晒佢哋。」
何鴻燊前晚跟任保良局籌委會主席的四姨太梁安琪、女兒何超欣及三姨太陳婉珍所生的女兒何超雲，到灣仔會展出席「保良局愛心跨越129慈善晚會」活動，出席人士包括保良主席陳小寶、汪明荃和蓋鳴暉等。
女兒獻花溫馨
擔任壓軸嘉賓的賭王，與蓋鳴暉合唱粵曲「婦人心之憐我愛」，籌得42萬5千元，其後有善長捐款43萬元叫賭王再高歌一曲，賭王遂唱多一次，但就改了部份歌詞來冧台下的四姨太，他將歌詞改成：「常常與安琪兩心向善，我若然若然係變遷，我總之揸兜乞米瞓街邊，阿琪不厭不厭，你銷魂美麗不遜劉嘉玲。」唱罷，蓋鳴暉即時拉被𠱁得笑逐顏開的四姨太上台，之後其女兒超欣上台獻花，場面幸福溫馨。
「一外一內啱晒」
問四姨太會否跟賭王合唱，她說：「唔會，我把聲唔似唱曲。」問賭王的水準是否很高，她笑說：「見仁見智啦，佢喺我心目中冇得頂，成個大老倌。」賭王早前偕三姨太陳婉珍及女兒超蓮出席有線節目《肥媽私房菜》教煮餸，還大讚三姨太入得廚房，問賭王覺得四姨太的廚藝如何，他說：「安琪負責帶我去食好靚嘅嘢，佢主外，佢比較喺社會上識好多朋友，鍾意出嚟社會多啲，一外一內啱晒。」問到下次可會跟四姨太上節目教煮餸，他說：「我同佢上節目跳舞啦。」
「可以掃低佢哋」
對於賭王指下次帶她上節目跳舞，四姨太說：「咁好？多謝畀個咁好消息我。」問她是否因為為人低調，不喜歡上電視，她說：「唔係，我唔靚吖嘛。」隨即指着鄰枱的港姐說：「我有佢哋十分一咁靚就搏命上鏡啦。」記者將此話轉述給賭王聽，他說：「唔係呀？佢幾時都咁靚。」記者再指四姨太謂自己不及香港小姐，賭王說：「佢一樣可以掃低晒佢哋。」
問賭王四姨太可是其心目中的第一位，他說：「差唔多啦。」是否害怕其他姨太呷醋？他說：「唔怕，第二個有第二個靚，個個唔同。」
此外，蓋鳴暉昨日在電視城錄影無綫節目《歡樂滿東華》，提到前晚跟賭王合唱，她說：「雖然何博士80高齡，不過佢好聰明好肯學，又冇架子，仲自己改歌詞唱畀太太聽，好溫馨呀。」
採訪：FredaLee
攝影：ChenWaiOn
