亞洲遊戲展（AGS）舉行前夕，賽車Game似乎特別旺場，繼早前同大家介紹過Sony王牌《GT5Prologue》，跟住落嚟又輪到世嘉經典系列作《SEGARALLY》！最新一集以「REVO」命名，除強化混合式賽道，並Update最新車款之外，今次仲首創車胎痕迹變化，越野車所到之處會留低一條深坑紋，唔同性質路面均影響行車表現。想靠一招半式駕駛技術走天下？行唔通喇！
記者：陳國輝
仲死記賽道？Out晒！
記得玩《OutRun》或者《RidgeRacer》系列嗰陣，雖然速度感極為暢快，但難度唔算好高，只要記熟條賽道，知道幾時轉彎、幾時放油嘅話，基本上攞第一名一啲都唔難！不過，呢次《SEGARALLYREVO》加入咗胎痕變化，意思就係當跑車經過泥路或沙地嗰陣，會隨時因地面出現凹凸不平嘅坑紋，令轉彎時冇咁順，甚至乎好容易發生炒車慘劇，呢種技術稱之為GeoDeformation系統。筆者試玩仲發現，手掣嘅震動會因應情況而加劇，大幅度抑或輕微震動，全部都Feel到。一句講晒，就係唔能夠再獨沽一味死記賽道過關！
泥漿四濺 背景欠動感
遊戲畫面亦唔簡單，《SEGARALLYREVO》以最精細嘅1080p顯示，玩盡XB360機能。尤其進行泥地賽嗰陣，泥漿四濺，水花唧落車身嘅質感最逼真，但草地、樹木以及湖泊等景色只叫勉強合格。最令人失望係背景欠缺動感，例如站在路邊的旁觀者，除相機會發出閃燈外，其餘動也不動，唔講還以為喪屍出動！但呢個問題可以理解，最大原因可能係大部份機能已經俾電腦計算胎痕時「榨亁榨盡」。
網上6人同時比賽
個人覺得，玩賽車Game最難頂嘅地方就係雙打模式，事關上下分割畫面真係唔靚，而且睇得勁辛苦！好彩，《SEGARALLYREVO》能透過XBOXLIVE上網，最多可聯同5名對手齊齊鍊車，無論你選擇喺泥地作賽，還是石屎路比賽，與網上高手較量，點都刺激過同電腦比賽啩！
5種地形考你技術 5粒★為滿分
碎石（難度：★★★）
表面亁燥，但由於多碎石積聚，令地面好跣，難以開盡轉彎，不過胎痕嘅影響唔算大。
泥地（難度：★★★★★）
因為地面極之濕滑，加上有泥氹積聚，行車時易留下深坑胎痕，稍不留神隨時炒到飛起。
沙粒（難度：★★★★）
感覺好似喺沙灘上比賽，與碎石賽道嘅分別在於沙粒更幼細，玩家好難控制擺彎嘅角度。
雪地（難度：★★★★★）
濕滑嘅雪地一向最考車手反應，唔單止地面跣會影響表現，甚至行車時留低嘅胎痕亦非常危險。
平地（難度：★★）
對RALLY車手嚟講最容易控制，地面胎痕對行車表現亦冇影響，勝負關鍵在於越野車嘅馬力。
PROFILE
機種：XBOX360
類型：越野賽車
開發：SEGA
玩家：1-6人
音效：Dolby5.1
顯示：HDTV1080p
售價：$299