呢兩個月無咩新車抵港，趁空檔借來以慳油見稱嘅Tiida作長期測試，睇吓部車係咪真係咁抵玩；坦白講，今次講嘅玩絕對無花無假，踩足3日2夜、48小時上山下海，差在未飛簷走壁咋！瘋狂蹂躪幾十個鐘，行足360公里，都只係用咗一缸油咁多，圍起都只係9毫幾1公里，慳油抵玩到你唔信！
記者：梁美甜
攝影：楊錦文
模特兒：Joanne
女仔操控游刃有餘
我個人雖然鍾情四驅高身大車，實際揸車都會揀番小型房車或K-Car，事關最怕大車轉彎難兼怕泊位刮花，仲驚泊極都泊得唔四正惹人話柄尷尬到暈！
TestDrive嘅Tiida話就話係小車款，但外形太過四正，一啲都唔係心水型車，最擔心嘅仲係揸住佢幾日，一個唔該出入揩花就大件事。誰不知揸上手感覺舒服，由九龍灣攞車接埋附近兩個朋友仔之後直踩入西貢食個雞飯。大清水條路有幾斜幾彎行過嘅人都知，入西貢嗰段就更加唔使講，條路又窄又多彎兼鬼咁多車，以落地行咗38公里嘅「新」車嚟講，初初轉數稍高，大油踩跑順咗之後，轉數回復正常，全程無論扭軚轉向都反應快，油門Brake敏感隨傳隨到，女仔都揸得掂，爽！
狂操$0.9/km
揸車嘅人都知買車唔難養車難，牌費、油費、泊車全部都係錢，尤其係日日揸車返工放工嘅話，條數認真襟計，為咗測試一下呢部所謂慳油至強嘅車，於是就開住冷氣踩足幾日返工放工，朝早放工都慢車龜行，行吓停吓耗油唔嘢少㗎！放工再車埋同事由將軍澳去土瓜灣，再行塞到想打人嘅紅隧去北角，再踩埋東廊經東隧狂飆繞道去太子接朋友遊車河兼食飯，由太子道塞到去尖沙嘴山林道，再行彌敦道經柯士甸道遊走成個九龍區。最後喺九龍城食個飯再返新界屋企，一日落嚟幾個鐘行足百幾公里，望吓油錶都跌咗都未夠一半，以1,500c.c.車嚟講，已經慳油過好多同級車。
第二日除咗返工路途遙遠之外，仲要走幾轉做順風車，兼冒雨塞車行太子道去旺角再返新界；第三日唔計返工路程，由將軍澳Office踩去九龍塘再經大埔道去沙田影相，再不厭其煩返公司放人至踩返新界。三日來毫無憐香惜玉地蹂躪Tiida，行足360公里之後終於油盡，入油站打爆油缸都只係五百零蚊，圍番條數都係9毫幾1公里，問心，Tiida慳油得嚟仲好抵玩！
操控更勝Corolla
老編同事都先後試過Tiida，兩個不約而同都話操控更勝Corolla，以1,500c.c.車嚟講上斜起步夠力，短途Kickdown爬頭從容有餘。車櫳就絕對啱全部人心水，事關以小車款嘅車櫳嚟講，車廂大皮椅夠舒服，幾高幾肥都一樣坐得疏乎！
之不過，行車時略嫌路噪較多，喺車內都覺得嘈，另外行平路部車比較震，可見懸掛系統舒適度設定仍有待加強。最唔慣係成日搵唔到時間，我一向守時，時間顯示對我好重要，錶板同中控台都無咗個鐘，後來至發覺唔開收音機或手動按鈕才可以喺螢幕顯示，好Lost！車身大初時泊位轉彎有難度，幾日落嚟迫住習慣，泊位亦見有進步，相信係我呢次TestDrive嘅最大得益！
照價大包圍
今勻試車用嘅Tiida完全無包圍，賣14萬8，據知代理現為其加推Aero-sport版，即係全車加有大包圍，車身兩旁更加裝裙腳及尾翼，仲諗住多套包圍照計起碼收多幾千啦！哈，點知代理擺明賣大包，加有全副Aero-sport包圍嘅TiidaDeluxe售價依然係14萬8，超抵玩！另外Luxury版都只係賣$129,800。
規格
引擎：1,498c.c.直4DOHC
馬力：109ps/6,000rpm
扭力：15.1kgm/4,400rpm
傳動：XtronicCVT無段變速自動波，前輪驅動
查詢：合誠汽車（28035333）
