祖籍四川嘅川哥，十歲時已經跟阿爺學廚，成班兄弟姐妹擔凳仔排排坐上堂。「阿爺就好似老師，有咩教咩。」可能受阿爺影響，烹調的不是那種精雕細琢的手藝菜，反而是簡單的家常菜，嗒落有很濃嘅家鄉情。家族幾代都喺成都、南京等地做餐飲，到咗川哥呢代，就得番佢一個人喺香港開川菜館，為咗不負阿爺所託，川哥經常搞搞新意思，推出啲啱港人口味嘅川菜。
川哥最拿手就係自創嘅班指蟹，「初時覺得一道菜得隻蟹，好似無咩食，咪將豬大腸加埋一齊煮，咁客人就可以食得飽。」點解叫班指蟹？原來用嘅豬大腸粗如古代人手指公戴嘅粗玉環「班指」，故取名「班指蟹」。講到班指蟹，川哥難掩興奮：「最厲害時，每晚賣超過20隻蟹，門口仲企滿排隊等食蟹嘅客。」川哥04年時推出班指蟹時，有客人質疑，覺得豬大腸同蟹都無關係，煮埋一齊，點得㗎?!結果創出另一種味道。川哥話：「𠵱家成日有人點班指蟹，都話加多啲大腸。」川哥最開心見到客人食完班指蟹一臉滿足嘅樣。
記者：洪偉順
攝影：梁細權
班指蟹188元/隻
用12両重嘅肉蟹公，加入魚香、豬大腸、薑蒜等一齊炒，蟹肉鹹香，微辣，豬大腸爽滑，別有風味。
蟹相麵188元/隻
青蟹炒香，落伊麵後以上湯煮熟。蟹香可口，鹹鹹哋更顯鮮味。
水煮蟹188元/隻
先以豆瓣醬爆熟青蟹，淋上以紅油爆香的指天椒，令蟹肉麻辣鮮甜。
小辣椒(25719822)
地址：北角北角道33號B2
營業時間：11:00am-5:00am