呢期興漢奸，繼《色，戒》易先生後，李柱銘就俾人唱做漢奸，突然諗起張愛玲都因為《色，戒》俾人屈「歌頌漢奸」，書中對白「不吃辣的怎胡得出辣子」被曲解為「辣椒是紅色的，吃辣就是吃血。」呢類文革式嘅批鬥令人心寒。
按照嗰啲人說法，小妹個friend阿江做咗「漢奸」。事緣佢買咗大美國出品嘅iPhone，但發現用嚟上網後電話費無啦啦多咗300幾蚊。佢話用緊數碼通一個服務計劃，38蚊一個月任用手機瀏覽網站，「我之前用其他手機無事，但轉用iPhone就收多錢喎！」
小妹打電話問數碼通，發言人解釋話該計劃俾用戶免費瀏覽網頁，唔包下載檔案，但個客（阿江）用手機透過網頁上MSN，可能會因而下載咗啲檔案，加上佢部iPhone未正式在港發售，會好似其他水貨手機咁，「解鎖」期間可能改變咗部機嘅結構，影響上網功能。「雖然未知係咪呢個原因，但我哋一直唔建議用戶用改裝過嘅手機。」雖然係咁，一直追求潮物嘅阿江仲繼續用iPhone，咁支持美國，仲唔係漢奸？
逢周一至周四刊出