韓星金喜善同富商朴駐英結婚已經近兩星期，但老公仔依然成為當地網友嘅焦點，藝人崔真實曾經話過佢係「肥版宋承憲」，之不過網友就另有一番見解，當中竟然有好多人話佢似台灣人氣偶像吳尊！
有當地網友睇完韓國電視台播嘅台劇《花樣少年少女》後，就即刻喺Daum討論區話金喜善老公好似吳尊，唔少網友都非常認同，當中Yubi就話：「特別係個鼻，簡直係倒模咁。」但好多網友話吳尊靚仔啲，而且塊面冇朴駐英咁長，睇嚟吳尊喺當地都開始走紅囉。除咗吳尊外，都有好多人話朴駐英似韓劇《朱蒙》嘅主角宋一國，難怪網友NODIBABO話：「吳尊加宋一國等於金喜善老公。」
公開度假靚相
網友比卡超就有啲唔同嘅意見，佢話：「似東方神起嘅U-Know允浩多啲喎，允浩老咗就係咁樣。」網友「好喜歡」就唱反調：「老公仔似韓劇嘅反派樣……擔心金喜善被騙。」
另外，朴駐英日前喺金喜善個網站度留言：「老婆，我愛你。」從而被阿Deep發現佢本人都有個blog，網內除咗有佢哋喺8月份去馬爾代夫預支蜜月嘅相外，金喜善都喺嗰度留言話：「老公仔，我好肚餓，快啲食飯啦。」真係肉麻到痹。
朴駐英blog網址： http://www.cyworld.com/footany
討論區網址： http://tvzonebbs1.media.daum.net/griffin/do/photophoto/read?bbsId=A000004&articleId=289023
版主：網盜王尊尼Deep
本欄逢周一至五刊出