樓市越旺，發展商推銷樓盤就越花心思越落本，好似香港興業（480）咁，喺澳洲買隻仿古船返嚟，話要放喺愉景灣做地標。仿古船來頭唔小，原裝正版叫「Bounty」，1784年建成，係一艘商船，1787年英皇佐治三世將Bounty改建，仲改個新名叫H.M.A.V.Bounty。至於呢隻仿製品，係1978年為拍電影《叛逆巡航》而建。
興業買隻仿製船返嚟改名叫「濟民號」。冇錯，係紀念興業前主席查濟民，Bounty本身亦有大方慷慨、樂善好施嘅含意，興業副主席兼董事總經理查懋成仲話，「濟民號」有近30年歷史，而興業一手發展愉景灣亦有30年歷史，係咪好夾呢！
講番隻船，查懋成唔肯講用咗幾錢買，如果想睇吓「濟民號」嘅風采，今個月20號喺中環三號碼頭會舉行盛大嘅抵港儀式。另外，隻船除咗放喺愉景灣做地標，仲會做善事，第一個幫助機構係「兒童癌病基金」。市民可以喺12月買飛上船參觀，收益捐畀兒童癌病基金。