呢幾日天氣突然轉冷，害得家住西貢嘅小妹臨天光凍醒，係時候買部電暖爐驅寒，但去到電器舖，花多眼亂都唔知點揀，除咗暖風機之外，仲有對流式、輻射式、充油式嘅暖爐，都係搵消委會啲老友教路。
老友話，唔同類型嘅暖爐各有特色。好似暖風機靠內置風扇吹出暖風，暖風吹到嘅位置先會較和暖；對流式嘅原理同暖風機都好似，不過暖風係向上自然咁升，將暖流慢慢循環至整個房間。充油式暖爐嘅優點係散熱較均勻，感覺上冇其他暖爐咁亁燥，弱點係充油爐必須先要將油加熱，延遲咗開始供暖嘅時間。如果想快啲暖，可以選擇一啲有內置風扇嘅充油爐，即時送出暖風。
至於輻射式電暖爐通常配備發熱管或發熱線，背後多有反射鏡集中熱輻射，產生類似陽光嘅溫暖，但用戶必須處於暖爐正面，越近爐身越暖。
老友又話，選邊款暖爐要睇吓自己心水同家居環境，好似充油式暖爐係好重，過度傾側可以導致翻倒；仲有，從表面睇唔易睇出暖爐發熱板嘅高溫，意外觸摸可能灼傷肌膚，所以屋企有細路仔就要小心用充油式暖爐。
小妹一個人住，唔使成間屋暖晒咁嘥能源，所以揀咗輻射式暖爐，好似太陽咁溫暖。
逢周一至周四刊出