溫總發表講話，因應4點理由而要延遲「開港股直通車」。歐陽風早排都分析過好幾次，除咗資本賬開放需時之外，最大問題還在投資者教育及洗黑錢問題。香港上市股票，其實已遠比國內的規管好得多，早幾年國內股市陷入低潮，除咗股改及國有股減持等利淡因素，最大原因還在公司質素。
或者係過去呢一兩年國內股市熱火朝天，令人忘記了年前多家國內企業接連出事的不快經驗，由於當時規管及法規未完善，致有上市公司造假圈錢、大股東佔用上市公司巨額資金拖欠不還、虛假出資、利用關連交易轉移上市公司資產及披露虛假訊息等事件。假如熟悉國內投資者，不妨問一問佢哋01至05年間長達4年A股熊市嘅經驗。
基金QDII撐起港股
香港上市公司法規雖較國內完善，但總有防不勝防之時，否則泰興及海域都唔會有咁多基金中伏。最大問題還在洗黑錢，如何防止黑錢透過上市平台輕易轉移，係頗難解決之問題，基金QDII有芬佬負責唔敢亂嚟，而直通車呢個平台，要管就會好困難。其實，歐陽風一向都唔覺得直通車對港股咁重要，一個上投摩根基金嘅QDII額度都50億美元，使唔使靠嗰啲散到唔散嘅內地股民撐起港股？
外資掃樓睇好地產股
直通車遲開，即係暫時唔使咁落力炒股，國內資金會唔會全力轉炒香港樓？北水會否炒樓未知，但種種迹象顯示，外資因聯滙因素，正全力掃樓，早前開售的貝沙灣、浪澄灣都各有外資基金大手入貨，日前恒地（012）新盤星匯居亦獲外資基金幾乎掃咗一幢，買咗400戶中嘅180戶。信基金無寶不落，一定係趁機買地產股，由於一手樓供應有限，二手樓成交必增，美聯集團（1200）仍可看好。
另港濤軒唔憂賣，買多隻太古B（087），勝在夠穩陣。