新地（016）郭氏三兄弟當中嘅二佬郭炳江鍾意跑山，好多人都知，估唔到除咗佢，新地都有唔少熱愛大自然活動，兼鍾意做善事嘅高層，好似新地執行董事黃奕鑑咁。
唔講唔知，原來黃奕鑑係香港青年旅舍協會（YHA）委員會主席，YHA係一個非牟利慈善機構，係國際青年旅舍聯盟會員，1973年成立，為咗慶祝明年踏入35周年，頭炮就係明年1月20號冧莊搞嘅「昂步棧道」慈善籌款活動。
黃奕鑑話，上次佢行晒全程，今次都唔例外，仲會嗌多啲新地同事參加。咁全程有幾長呢？據大會所講，當日朝早9點由東涌站出發，繞過石壁水塘、寶蓮寺、昂坪市集、心經簡林等名勝。行幾耐悉隨尊便，不過最短都要3粒鐘，想挑戰自我就起碼8粒鐘。
名額得1200個，12月8號截止，今個禮拜六（10號）或之前報名繳費，就得YHA一年會籍。至於報名費同要籌幾多錢就按組別而定，自己上網 http://npcw.yha.org.hk睇吓啦！