超大（682）主席郭浩，上星期帶隊北上，考察佢哋嘅揚州基地。郭總種菜叻，估唔到炒股都有個人心得。
第一、睇老闆個樣，強調「不要買小白臉」揸弗公司嘅股票，因為通常都係得個樣，佢自嘲自己「長相難看」，呢一類先信得過；
第二、睇團隊size，如果公司團隊得幾個人，千祈唔好買，因為咁少人做嘢，公司增長邊會夠快；
第三、睇行業，冇前景嘅唔好買，仲要睇行業size，逾萬億就可以考慮。
講咗咁耐，即係咩股票值得買？郭總話，最好嘅股票當然係超大，不過資源股同內房股都唔錯。
超大上市7年，一度係基金愛股，但亦曾被洗倉，負面新聞除咗郭總耐唔時配股（5年來配股抽水逾35億港銀），又周不時傳超大農地「有名無實」，最致命嘅莫過於頻頻換核數師。不過，郭總話，每年換核數師嘅公司股票一定要買，事關年年換得核數師，一定係盤數冇問題先可以咁做；不過，佢提醒散戶，頻換得嚟都要「無保留意見」，如果唔係都係買唔過。咁佢當然唔少得提醒大家，超大上市7年都係「核數師無保留意見」。