成功男人的背後，要有一個……男人？死神流克、紀曉嵐等，個個無咗呢個麻甩佬，連聲都開唔到！ 講緊嘅係喺無綫做咗十幾年的配音員招世亮。佢把聲愛演戲，原來真人也愛編導爛戲。唔係屈佢唔掂，而係佢最近編導舞台劇《非常爛劇》。配音、編劇、導演，這個愛站在背後的男人，告知背後自有背後精采。
記者：馮冠芝
攝影：陳陶鈞
戲劇背後 鬧爛劇定爛鬧劇？
雖不至賣花讚花香，但也不至自貶身價，命名《非常爛劇》，目的何在？「我想指的是一套非比尋常的爛劇，而且是非常爆笑！此外，劇中好多嘢都是爛的，例如道具。」阿招用平時配《日本風情畫》的旁白聲音解畫，我只顧飽耳福，卻沒聽清內容，《非常爛劇》到底是鬧爛劇，還是像《再會歡樂今宵》的爛鬧劇？「我哋比《再》排練多啲！我套劇係講一個劇團在演出時發生很多意外、蝦碌嘢等！劇情以外，又會要演員在演出時扮到真係有蝦碌嘢，絕對係戲中戲中戲。」阿招自信滿滿。記者疑惑，要玩蝦碌何以不玩即興？難道《再》不堪入目，前車可鑑，教阿招不敢亂來？「咁連《再》的高手玩即興都唔準確，punchline做得唔好，我班演員有新有舊，玩唔過！」
寫作背後 20年演員生涯
背後男人獨有的謹慎，編導出一套關於舞台劇背後的劇。源於阿招多年的業餘演員生涯的蝦碌！「有次我演殺人狂的助手，在大屋內對眾人說：『呢度嘅門窗都鎖實晒，你哋一個都走唔甩。』講完，道門『eat~~~』一聲……」繪影繪聲，害我都以為有道門打開了！更感受到當時演員的無助，「演員們逃生時全當看不見那度門。那場戲，真是非常爛啦！」阿招嘴角上揚說。享受舞台劇考即場反應，令他留戀舞台20多年，由演員到做編導，幕前走到幕後，因為「騰騰震」也有野心，「雖然鍾意，但每次演出執生我都好緊張，所以咪做幕後！說實在，做導演可以控制更多，是另一種享受。」《醫道》的許浚……不，阿招堅毅地說。計落，阿招以業餘性質參與舞台劇的時間，遠比當配音員長，他對戲劇的喜愛，不亞於許浚對醫的執着。
配音背後 錄音室沒了笑聲
講嚟講去都係戲，阿招未做配音前，是個送貨員，當初也是漁翁撒網，考DJ、演員不行，反倒是配音員，幾千人選十多個，又給阿招考到。難道配音非他本意，只為生計？「在舞台面前好多限制，好似我就一定不能做靚仔啦！但配音就可以。」用聲音過足戲癮，「配音流水作業，上午配皇帝，下午配太監，我唔小心將皇帝的威嚴配咗落太監度！」種種趣事，阿招都講唔晒。配音的苦，反而來自同事的離去，伴着8字頭的小林大地配音員黎偉明、配大雄的盧素娟相繼去世，「平日錄音室總不斷傳出笑聲，但他們離去那陣子，錄音室沒了笑聲，很靜。」記者也回不了話，自小睇卡通睇到大，沒了那幾把聲音，也不止失落，何況與之朝夕相對的招世亮？須臾，反是阿招安慰我，「唉，人生就係咁，離離合合。」
配音天王
阿招背後 家開濟公廟信耶穌
看得豁達，與信仰脫不了關係。歷年來為基督團體演出編導，阿招跟我說他信耶穌，我一點也不驚奇，奇就奇在，他家以前開濟公廟！戲劇最愛的元素：「衝突」竟在阿招的人生顯露無遺，記者眼眶發光，他卻淡淡一句：「家人無話點反對，可能因為阿哥也信基督，現在更成為牧師，當了個好榜樣。」淡化了色彩，記者省起，招世亮一向如月亮，愛在黑幕下發光芒，站在背後發亮光。
爛劇率先睇
《非常爛劇》
日期：11月9-11日（8pm）
地點：香港文化中心劇場
訂票：27349009