呢幾日開始，每日都有就立法會港島區補選嘅民調結果公佈，作為大熱嘅陳太同葉劉，已經提前進入埋身肉搏階段，作為塘邊鶴嘅八方睇到覺得好肉緊，皆因咁樣跑馬仔，最後選舉出現乜嘢結果都好難預測。
抽籤攞到luckyseven嘅7號候選人陳太，噚日就趁住風和日麗嘅星期天，同堂妹方敏生去到赤柱拉票。陳太今次落區冇搵泛民代表傍住，反而搵咗一位喺赤柱住咗40年嘅退休教師做盲公竹。阿太一到赤柱，就沿巴士總站、市集，一直掃落赤柱廣場派傳單。赤柱嘅周日一向人頭湧湧，𠵱家仲有藍天、陽光加埋一位印住四萬笑容嘅靚太喺度派單張，就八方現場所見，唔少大人、小朋友、檔攤負責人，仲有專程去赤柱影婚紗相嘅新人，都爭住同陳太合照。就連外籍人士都主動同陳太講句"Iknowyou!"，其實唔少外籍人士亦係登記選民，唔能夠忽視。
「唔計攞多幾多票」
至於4號候選人葉劉，噚晚就瞓身柴灣，去到翠灣邨一個公屋單位過夜，話要親身體會一下嗰度嘅地鐵噪音問題喎。唔知有意定無意，葉劉去嘅竟然係好易令人聯想起23條嘅23樓。做慣高官兼夾家底唔錯嘅葉劉，只係拎住大小兩個手袋，去到同呢個600呎單位嘅李伯一家四口迫埋一齊，70幾歲嘅李伯已經騰空一間睡房畀葉劉，等佢領略吓對住地鐵路軌有幾咁「寧靜」。咁樣瞓屋邨無非都係要爭取公屋選票，葉劉否認為選票而嚟，「我只係嚟學多啲嘢嘅，唔會計攞多幾多選票。」
落區過夜嘅做法，當年嘅民航署長、後來退咗休加入民建聯嘅樂鞏南就曾經入住九龍城，體驗啓德機場噪音問題。樂鞏南嘅舊橋近期都幾hit，除咗葉劉翻炒之外，民建聯副主席蔣麗芸上星期亦去到天水圍公屋過體驗生活，富家女蔣麗芸唔知係咪住唔慣，搞到半路中途要住一晚酒店回氣。
親身體會固然可以令從政者對社會問題多一層認識，但識咗唔去做正正係𠵱家各方不滿葉劉嘅地方。葉劉周不時話佢同中央關係有幾好，兼夾佢去過美國留學好認識民主。八方不禁要問葉劉：如果真係咁認識民主，點解佢嘅政綱對普選時間咁彈弓手？點解唔運用自己同中央所謂咁好嘅關係，畀香港嗱嗱聲實落雙普選？