噚日恒指大跌超過千五點，加埋上個禮拜五跌嗰千幾點，兩日夾埋港股跌咗兩千五。唔怪得華華上個禮拜問堪輿學家麥玲玲，佢話要等埋今個禮拜四立冬之後先叫安全。除咗麥師傅，陸東同李兆基兩位投資者「信奉」嘅股神，晨早亦提咗你港股要跌。不過，股神始終唔係真「神」，點同真正操生殺大權嘅總理溫家寶比，溫總一句說話，單係港股兩日就唔見咗1.02萬億市值，呢啲咪就係「一句值萬億」囉！
電郵：mailto:[email protected]
李兆基：跌一二千點好入市
如果大家仲記得，香港股神李四叔上月26號，喺恒指歷史性企穩三萬點樓上收市當日，再度預測港股去向，佢話恒指聖誕後三個月內可見三萬三，但就叫大家趁低吸納。當時恒指可以話係點咗火嘅火箭，大家都認為唔使等聖誕過後先見三萬三，仲有個市淨係識升，幾時有機會趁低吸納吖！
點知睇吓呢兩日，恒指上周五跌1024點，噚日再跌1526點，跌返三萬點樓下。四叔提醒市民跌一二千點就好入市，升一二千點就咪追嘞。嗱，信四叔嘅有冇趁低吸納先？華華唔敢煽風點火，只係提吓你啫。四叔10月初預測恒指10月份內可升至三萬點，預言已經應驗。
之前個市喺咁升，人人都做得股神，但能夠好似四叔咁，貼升又得，貼跌又中，睇嚟呢次之後，四叔會再多啲粉絲。
陸東：容易受傷的股市
除咗「香港股神」，喺基金界都有一個眼光獨到嘅「股神」陸東，佢上月底發表嘅報告，「預言」恒指會急跌，結果有目共睹。
陸東嘅報告，劈頭已經用「Anexpensivemarketisavulnerablemarket」，即係太過貴嘅市場就係好易受傷嘅市場。陸東話，港股估值太貴，超出基本因素，無論以預測市盈率、市賬率同股息率三大因素推論，都係偏貴。加上投資者睇得北水南調對港股嘅影響力太大，所以預測恒指短期會調整3000至4000點。
報告「面世」唔夠兩日，恒指兩個交易日夾埋跌咗8%。其實陸東睇市一向準，10月10號，佢話傳統藍籌長實（001）、和黃（013）、九倉（004）同太古（019）現價同估值仍然吸引，話口未完，幾隻股票最高曾升近兩成。再數前啲，9月24號陸東預測明年港股最保守見二萬八、最樂觀睇三萬五，當時嘅恒指都只係26551點，唔夠半個月，恒指就升穿二萬八。
5隻牛證陣亡
噚日港股狂瀉千五點，有5隻牛證被迫強制贖回，包括兩隻恒指牛證同3隻國企牛證，當中4隻由瑞銀發行，一隻係荷銀，成為跌市「祭品」。
睇番噚日牛證嘅死亡時間，最先被「迫」嘅係瑞銀國企指數牛證（6227），當H股指數喺10時46分跌落19000點時，率先陣亡。冇耐，恒指跌破29700點，另一隻瑞銀恒指牛證（6270）亦宣佈死亡。晏晝港股跌勢加劇，3點10分至3點40分，唔夠半粒鐘，3隻牛證（6226）、（6253）同（6252）亦先後不治。
其實大市咁旺，華華都好耐冇見過牛證被「迫」，最近一次大批收回牛證事件，係今年8月15至17號，港股曾急跌逾千點，但出現單日大轉向，3日內有14隻牛證被收回。
十友送熊贈「㷫」
美股越跌越多，今日開始公開招股嘅十友控股（033），主席許坤華就越開心。佢話如果美國經濟真係衰退就掂晒，因為經濟唔好，啲人就會轉為買佢哋做嘅1美元平嘢！
為咗令大家對佢嘅產品更加了解，佢哋噚日特登送咗個聖誕節禮包畀記者。個禮品包有一隻淡友恩物熊啤啤（左圖），同埋聖誕老人裝飾。真係好嘅唔靈醜嘅靈，噚日港股跌多千五點，外圍亦唔多掂。呢隻熊啤啤都可以話「物輕情重」。