溫家寶「叫停」港股直通車，港股亦可趁勢再清一清熱氣，恒指急升上32000點水平後，即使回到27000至28000點，落番十零個巴仙，亦係好正常調整。
長遠而言，港股係內地資金排洪的主要出口，不會有變，直通車暫時唔開住，但以幾千億元計的QDII，以及「晒士」更大、現時已透過不同渠道大舉南下的北水自由行，仍會源源湧入，繼續在本港股市擔當重要角色。
港股水浸，藍籌同中資股降溫，資金要覓炒作對象，已開始有勢的二三線股，升勢將會加快擴散，特別係有消息及轉型的股份，更會成為被追捧的對象，上周五大跌市中仍能大升24%的139控股（139），就好值得留意。
成交大增動力強
139控股連升3日，由0.44元衝上0.72元收市，上周五成交更大增到1.22億股，動力越來越強，主要係有大行同基金大手吸納，消息指139控股進軍越南已有突破性進展，有機會成為明日之星。
越南經濟急速起飛，已成為本港上市公司南下拓展的熱門地區，139控股進軍越南，搵對門路，同金源米業（677）及VinafoodII合作，樣樣事半功倍，發展步伐肯定會好快。金源十多年前已進入越南市場，係先行者，對當地情況瞭如指掌，早前已認購139控股18.78%股份，成為策略性股東。
Vinafood的來頭更大，係越南政府屬下數一數二的國有企業，除係越南最大食米出口商外，亦經營多項農業、水產、肥料及消費食品的進出口，並擁有倉庫、碼頭同地產等優質投資項目。139控股得Vinafood支持，在越南發展的前景非常樂觀。
合作夥伴有來頭
139控股已與金源及Vinafood訂立協議，成立多間合營企業，在越南經營便利店、物流、倉庫及地產業務，其中便利店項目與一國際品牌的洽商已到最後階段，相信好快會有好消息，估計一年內可在市中心及主要地點開店數十間。
139控股已準備改名為「越南控股有限公司」，顯示其在越南大舉發展的決心，日後開拓物流、倉庫和地產業務，逐步發展成大型綜合企業，有機會成為越南的「和黃」。