總理溫家寶一句說話叫停港股直通車，港股噚日即急瀉超過千五點，喺網上討論區，好多網友都埋怨溫總，Xelion話：「中央成日話要穩定，但唔知自己先至係最唔穩定嘅因素，首先就嚟個直通車，等你炒到癲，之後就彈弓口，話冇時間表，神又佢鬼又佢。」
WONG1686就話：「完全領略到中共嘅威力，佢一句話要你升就升，要你跌就跌！」Kwaip24：「唔通溫總係『淡友之父』。」撲黑臉直頭用『千股罪人』形容溫總。
轟中央彈弓口
不過，唔少網友都仍然睇好後市，唔覺得會出現股災，Sekseong：「呢個時勢一日跌一千點或者升一千點，都係小事，唔使太驚。」Tonyma12認為：「淨係QDII都唔少錢嚟香港買貨，又再加埋上邊一大袋嘅私人投資，就算直通車遲開一年半載，都冇問題。」Tropicalfish：「要趁調整掃平貨，唔使諗太多，唔係就錯失良機。」Kevinelevan：「唔『危』邊有『機』，自己次次都係一跌就入，隻隻都賺，唔使怕喎。」