天氣轉凉，一家人做最暖笠笠的事，莫過於在家打邊爐。今季最新邊爐用具早已出籠，款式多不勝數，要功能有功能，要款有款，要經濟實惠都有。各位邊爐狂熱分子，不過最好就買個多功能火鍋爐，咁想打邊爐或鐵板燒任你話事啦！
記者：劉明慧
攝影：陳盛辰、梁細權
熱鬧中式邊爐
香港人一年四季都打邊爐，買一個實用火鍋爐喺屋企傍身絕對有必要，而且就算有朋友上嚟玩，又或者一家人溫馨familyday都得。啱啱踏入秋冬，一系列新火鍋爐亦上場，小記率先試吓佢哋有幾好用：以水滾速度（即用多少時間滾約1公升水）和易潔度（即是否方便清潔）兩方面去畀分，睇吓係咪有姿勢有實際。
（以★★★★★為最高分）
簡單小測試
煎炒燜蒸鐵板燒樣樣得
Princess家庭鍋除咗可以做火鍋，仲煎炒燜蒸同鐵板燒都得，溫度可由115℃調校至215℃，直徑約25cm，夠晒4人家庭用。其防黐底表層就算唔落油都唔會令食物燒燶。$480（a）
水滾度：唔使1分鐘已經水滾，而且受熱點均勻。
★★★★★
易潔度：拆咗電源就可以成個拎去洗，放入洗碗碟機洗都無問題。
★★★★
Cool味十足
荷蘭著名室內設計師JandesBouvrie首次為荷蘭家電品牌Princess設計"Let'sCookbyJandesBouvrie"系列，仲特別融入亞洲中式火鍋設計，睇落去四四方方加上銀色外形甚討好。拎上手比想像中輕身，而且容量有3公升，又可以調整溫度，最高達2000W。$580（a）
水滾度：校到最大火力約要2分鐘就煲滾。
★★★
易潔度：用清潔劑同水洗，再用布抹就掂。
★★★★
中西合璧
Let'sCook另一款爐，外形一睇以為係芝士火鍋爐，但原來都可以做到中式火鍋，有1.5公升容量，可以調節火力，最高達1000W。除此，又有恒溫裝置，唔怕煲亁水，仲附送8支有顏色記認的火鍋叉，唔會用錯人哋個支。$780（a）
水滾度：大約要2分鐘便水滾，若做整芝士或朱古力火鍋，就切忌大火，因為會黐底。
★★★
易潔度：用清潔劑同水洗就得，但個煲深而口窄，要洗底就畀多幾錢肉緊。
★★
迷你款二人鍋
這款細細個的Cuisintec萬用鍋，就有煎蒸炒燜功能，容量大約1公升，最啱兩小口溫馨一番。火力雖然細，最大只去到500W，但煎牛扒、煮公仔麵都做到，有易潔湯鍋及烤盤可以替換用，仲送埋蒸架蒸點心㖭。$498（連2人飯煲）（a）
水滾度：約分半鐘就水滾，但鍋唔深，容量比較少。
★★★★
易潔度：湯鍋同烤盤都可以拆出嚟洗，而且易潔質地，唔怕黐底。
★★★
烚烚吓都要識揀
唔好以為打邊爐隨便有個煲就可以，原來揀煲都要有一手，例如揀傳熱快同受熱均勻嘅質地，咁就唔怕等好耐才令食物熟透。好似𠵱家新興嘅3層不銹鋼煲，唔會黐底兼受熱均勻，煲水時唔會發出吱吱聲，亦不會令水過熱彈出。揀時可以睇吓佢個煲底，如個有條明顯圓圈紋，就代表只得1層不受銹鋼料，會影響受熱程度同易黐底。
阿姐教揀煲
另類特式口味
除了中式烚烚吓，瑞士火鍋同日式ShabuShabu都係另一冬日選擇，以下介紹的火鍋爐就最適合，輕輕鬆鬆就可以在家享受日式原始及瑞士火鍋「芝」味。
三位一體
這款Chantal芝士、朱古力火鍋爐，共有兩層，下層可放水坐熱上層芝士鍋，唔怕芝士接觸火而容易燒燶；就算唔做火鍋，平日用嚟溶朱古力整甜品都得。火鍋爐附送6支叉，可以較大細火力，食剩嘅芝士亦可冚蓋放入雪櫃，都幾方便。$929（b）
囗放酒精膏位置可以調校大細孔，控制火力。若全開酒精膏可以用1個鐘，開單孔可以捱到3個鐘以上。
囗一套共有底座、底煲連蓋和陶瓷煲，合體和分開用都得。
囗每支叉柄上有1-6條橫紋做識別。
不可直接用火燒
這款又係朱古力/芝士兩用Fondu，共有6支顏色記號叉，而且個鍋有手柄方便拎起，不過就唔可以直接放在其他爐火上燒，會有爆裂危險。$205（c）
外形趣致
呢個IroriPot就係細細個嘅日式ShabuShabu，外形討好，雖然火力唔太大，未必可以令食物熟晒，但當做餸咁上，都幾趣致。
日式鍋連蓋$140
底座$130（c）
（a）Best（27574263）
地址：九龍灣宏照道38號企業廣場5期megaBox6樓
（b）ilovekitchen（28151883）
地址：銅鑼灣禮頓道1號地下
（c）city'super（22347128）
地址：中環IFC1期1樓