最近港股升，港滙升，應該人人開心，因為我哋香港人荷包腫脹，出外旅行使錢，更加輕鬆也。可惜呢，港滙只係兌美元表現強勢，兌澳元、加元、英鎊，仍然落後，呢個時候有子女在英加澳讀書者，無不叫苦。
港紙兌美元升值，上到7.75上限水平，令金管局不得不出手干預，入市沽售港紙，買入美元。現在市場盛傳西水東調，北水南來。香港無門無閘，洪水湧入，問你點頂？呢日左丁山探訪某機構，一位執行董事話：「Weareswimminginthemoney.」左丁山開玩笑咁問：「不如你派錢畀我！」唔得噃，執行董事話：「我哋要依照政府加薪幅度，冇年尾花紅，請多啲人要監管當局批准，實情係有錢冇碇使，最多請你食餐飯。」
食餐飯用得幾多錢吖，忽然間諗起，特區政府正在金錢洪流裏游水，唔怪得與地鐵傾偈幾年之後，突然應承津貼地鐵六十億元起西港島綫，原因就係有錢冇碇使啫。既然如此，股票交易印花稅可唔可以削減呢？取消晒就大想頭一啲，𠵱家每日成交額咁大，政府收印花稅收到手軟，點肯放棄唔收吖，但減一半，減三分一，得唔得呀？
後來碰到大經紀行嘅大經紀Y，與佢傾起北水南來，港股直通車，於是問佢：「直通車未開車，成交額已有咁多，假如真係開車到港，場面會點墟冚法？」大經紀Y話：「你同我定。據我哋公司大老闆得到嘅消息，港股直通車已經與董生八萬五畫上等號。記唔記得董生曾經講：八萬五冇講好耐嘞，即係等於取消咗八萬五。嗱，中央正想冷卻港股直通車呢回事，但礙於外滙管理局嘅威信，唔好意思正式取消，故此向昔日董先生學習，唔講唔講就等於冇咗。」如果係咁，點解一啲香港大官仲係敷衍住我哋，久唔久就話就快咯就快咯咁呢？經紀Y答：「即管放長眼睇！」原來唔使放長眼，呢篇稿一交咗畀《蘋果》，第二日（十一月三日）已經聽到溫總理話港股直通車有四點考慮，副刊編輯急急要求左丁山作適當修改，惟有刪數十字，加本段上去。