今年無綫搞個《翡翠歌星賀台慶》，真係㷫囉，唔單止好多大牌歌星冇出席，出席表演嘅又俾人鬧，收視又唔好，成單嘢真係吃力不討好。影視處收到七宗關於呢個節目嘅投訴，指女歌星表演舞蹈環節不雅，意識不良，品味低俗同兒童不宜，唔知係話關心妍、胡琳同江若琳跳嘅鋼管舞，定係容祖兒性感瞓地跳舞。又有網友大罵曾志偉喺節目裏面經常人身攻擊，好冇品。
出動女歌星瞓地賣弄性感，未必是收視保證，《翡》平均收視只得24點（約156萬觀眾），最高收視25點（約162萬觀眾），翻查資料近年呢個節目嘅收視，05年的平均收視約181萬觀眾，06年平均都有188萬觀眾，可見今年真係創新低。
志偉祖兒：都係搞氣氛
志偉噚日接受商台訪問，對於被網友批評，佢話：「可能有啲人戴住有色眼鏡嚟睇，大家都係搞氣氛，如果淨係讚就唔好睇啦。」有份表演嘅容祖兒噚日都喺商台宣傳新碟，佢話：「司儀鬥嘴都係搞氣氛，係表演嘅其中一part，以前一路都係咁，不過𠵱家多咗投訴機會，最緊要當晚大家玩得開心。」
無綫總經理陳志雲噚日接受商台訪問時話：「話奀星賀台慶好似唔係咁公道，有好多大星都要做演唱會嚟唔到，要到嘅都到咗，同埋要畀多啲機會新進歌手表演。」無綫外事部宣傳科經理蘇燦榮噚日就透過電話回應話：「節目裏面跳舞項目畫面係以優美為出發點，而且其中一項poledance（鋼管舞）亦係外國好流行嘅健康舞之一，希望大家唔好有所誤解。」
