𠵱家中學都有籌款潮,傳統名校拔萃男書院噚日宣佈獲得一筆為數7,000萬蚊嘅捐款,作為起新宿舍大樓部份費用,係繼05年李嘉誠捐8,000萬畀聖保羅男女中學後,中小學界第二筆最大單一捐款。
捐錢回饋母校嘅係恆豐酒店創辦人李文華孻子李德義,佢58年喺男拔中學畢業,之後去咗美國麻省理工(MIT)讀建築,𠵱家係建築公司老闆,佢個大仔𠵱家喺男拔附屬小學讀緊。男拔介紹李德義身家豐裕:喺倫敦中部有200座物業、日內瓦商業區有3座、東京有15座商廈。佢話唔少係父親留低,但身家有幾多,當然唔方便講。
有宿舍住成熟啲
男拔起呢座新宿舍大樓,總共要1.1億元,大約三、四年前,李德義同負責籌款嘅校友、立法會議員張宇人講起,得知仲欠7,000萬,「只係諗咗幾秒鐘」就應承捐錢。佢話以前讀書時冇得住宿舍,去到外國發現有住宿舍嘅同學,比自己成熟好多,所以即刻應承出錢幫吓師弟。
新宿舍有300個宿位,附設室內泳池,預計明年入伙,張宇人話每人每月宿費要5,000蚊。男拔校友唔少都係商人,好似田北俊同田北辰、林建名、霍建寧、范鴻齡等,籌款自然水到渠成。
女性較少從商,咁女校籌款又係咪好蝕底呢?正籌緊2.5億元嘅拔萃女書院,有負責籌款嘅校友話,佢哋嘅畢業生冇錯都係主要做乜乜師,從商較少,「但都有人幾千萬咁捐,所以我哋將籌款計劃擴至3.8億。」女拔從商嘅校友,有李嘉誠紅顏知己周凱旋,以及港姐楊寶玲,其他名校友包括唐英年太太郭妤淺同港姐孫泳恩等。