當今球壇名牌至上，如果巴西球員係Gucci名牌手袋，咁非洲球員就係羅湖城嘅Guggi袋。同樣係黑色皮膚，非洲球員除技術外，力量、速度同柔韌度都好過巴西兵，但唔係「巴西製造」始終都係次等貨！我求大俠突然咁感慨，全因為樸茨茅夫前鋒馬華路禾尼。
入8球壓倒歐洲名牌
馬華路禾尼好可能係繼前利物浦門將高巴拿後，津巴布韋最偉大球星；呢位前鋒喺英超開季至今射入8球，壓倒安歷卡、尹佩斯同費蘭度托利斯等歐洲名牌，佔據射手榜首席。原來馬華路禾尼季前目標係今季在所有比賽入15球，勢估唔到𠵱家已經入超過一半，真係犀利！
前晚「樸茅」4:1大勝紐卡素，頭11分鐘已領先3球，馬華路禾尼入第2球充份反映其速度同力量；領隊哈利列納賽後大讚：「強行爆開對方中堅，一個集力量、體力同速度嘅入波！」紐卡素領隊艾拿廸斯賽前已警告過隊員，可惜都難逃大敗。
今年「樸茅」開季成績理想，可以講靠晒7名非洲兵，馬華路禾尼、烏達卡、中場柏巴廸奧普同蒙達利，加埋後備簡奴，更加係中前場嘅進攻「同花順」！唔怪得啱啱續約嘅哈利列納話，好擔心明年1月開波嘅非洲盃，會影響爭逐歐洲賽參賽資格。
「樸茅」佳績靠非洲兵
又難怪哈利列納咁擔心，因為除咗津巴布韋出唔到線，馬里、喀麥隆、加納、塞內加爾同尼日利亞都入圍；換言之，佢手頭嘅「同花順」到時得番張「K」，都咪話唔頭痕！