灣仔新盤尚翹峰，高層現樓貨尾賣到成萬蚊呎，上個月唔聲唔聲好賣到你要驚，作為大股東嘅市區重建局，自然飲得杯落。華華有日落開灣仔，順道參觀吓呢個街市新盤，睇吓有咩把炮咁值錢？喺完全摸不着頭腦之際，發現喺三幢四五十層高新廈之間，夾住一幢廿零層嘅單幢樓忻怡閣，對到正尚翹峰第1座個背脊，面壁樓景暗無天日，華華即時泛起無限同情。再望真啲，發覺最低3層單位吉咗冇人住，心諗，個業主放盤一定放到好心痛。點知問一問區內代理，先知另有內情。
忻怡閣係市建局前身土地發展公司，喺90年代初嘅舊區重建項目，樓高23層，每層兩伙，共46個單位，面積一律508方呎，94年開賣，當年賣到成四千幾五千蚊呎，即係二百幾萬一間，不過，最低3層共六個單位，唔知點解當年一直冇攞出嚟賣。
直至03年沙士期間，無端端低調放售，定價大約110萬銀，好似好平，但係當年太古城都只係賣緊三千幾蚊呎，又有邊個會用二千幾蚊呎買呢個隔籬係街市、實用率只有65%嘅單幢樓極低層戶呢？結果好自然係低調的放售、低調的收檔啦。
重建後唔賣 沙士賣唔出
4年後嘅樓市，又再一次鹹魚翻生，聽講市建局早輪為呢幾個忻怡閣陳年倉底貨更換喉渠，有可能再次放售，據班代理估計，定價應該可以去番13年前嘅水位，即係大概200萬銀嘅水平。點解咁睇好？咪就係多得尚翹峰囉，因為個盤嘅買家，十個有七八個係投資客，買嚟收租，呎租普遍三十幾蚊，一般回報有5厘，甚至6厘，所謂掹車邊都有得食，忻怡閣雖然冇景，但係地利位置同尚翹峰一樣，點都吸引到班收租客捧場。
今鋪最高興嘅應該係市建局主席張震遠。
前身係黃仁龍出生地
忻怡閣呢個盤都算傳奇，市建局hold住唔賣，結果沙士要劈價賣，點知又賣唔出噃，捱吓捱吓，又畀佢翻生，呢啲咪就係「香港傳奇」囉！
講開「香港傳奇」，律政司司長黃仁龍亦都被稱為「香港傳奇」，黃司長雖然出身寒微，一家人全靠父親黃鑑烈推車仔賣雪糕營生，但佢努力上進，終於做咗今日嘅黃司長，前途無可限量。
華華無啦啦講黃司長，係因為佢同忻怡閣有一段淵源。呢幢住宅嘅前身有間「新生留產所」，就係黃仁龍出世嘅地方。
聽黃司長講，佢曾經幫政府處理灣仔道舊區重建嘅賠償同司法覆核cases，有次親身落區實地視察時，先發現清拆引起爭議嗰幢舊樓，就係自己出世嘅留產所。
忻怡閣收租回報逾6厘
忻怡閣二手市場今年以嚟成交，十隻手指數得晒，呎價3800至4200蚊，大概都係200萬銀左右，13年嚟個面價幾乎打個平手。二手放盤唔夠十間，一般呎價4000蚊，最貴叫價成5300蚊呎，收租唔錯，普遍1萬到萬二銀一個月，呎租20到24蚊，回報超過6厘。
至於帶挈忻怡閣嘅尚翹峰，係由劉鑾雄嘅華置（127）同市建局一齊合作發展，總共有3座，有成652個單位。喺正忻怡閣前面「篤眼篤鼻」嘅係尚翹峰1座，聽發展商講，家陣3座夾埋已經賣出咗九成五嘅單位。
𠵱家尚翹峰仲剩番十零個單位，平均呎價9900銀，早排1座頂層連天台嘅特色B室單位，面積只有628呎，賣出價高達810萬銀，平均呎價差唔多高達萬三銀。
mailto:[email protected]
