「眾人皆醉我獨醒」，不少蟹迷迷戀陽澄湖大閘蟹，非此湖蟹不食，但以大閘蟹聞名的老上海飯店，25年來一直「醒着」，堅持選用太湖蟹，負責人張泳佳：「近年太湖的水質很好，生產出嚟的大閘蟹一年比一年肥美，質素絕不遜於陽澄湖，以五両重的蟹為例，九成爆膏兼肉質肥美、嫩滑鮮甜……對我嚟講，太湖蟹一樣咁正宗。」
蟹膏是大閘蟹的靈魂，蟹醋則將靈魂昇華。「一般食肆用普通鎮江醋，我哋嘅醋加咗白糖、薑茸等，令醋帶甜更能食出蟹膏的鮮。」難怪蟹癡如許仕仁、趙世曾等，每逢蟹季必到此定期擦蟹。
顧客每晚忙擦蟹，張生每朝卻忙拆蟹。「我哋每朝全部員工都會坐埋一齊拆蟹粉，我哋會用3、4両重嘅新鮮大閘蟹起膏，蟹膏絕對唔會過夜，因為一唔新鮮，一入口就會腥，我地唔會俾呢種事情發生。」對蟹的執着，亦令張生由侍應變成負責人。「沙士期間，舖頭生意一落千丈，舊老闆決定唔做，我哋一班老員工好唔捨得，咪頂咗嚟做，若果唔係，𠵱家未必可以再見到老顧客對太湖蟹嘅讚嘆。」
記者：洪偉順
攝影：梁細權
蟹粉小籠包100元/5隻
咬破橙紅色的小籠包身，吮飲鮮蟹味濃的熱湯，只有鮮甜。
蟹粉小排翅300元
用足両半的金勾翅，每條翅粗如牙籤，口感十足，配合味濃的蟹粉，回味無窮。
拆蟹三部曲
1.剪去蟹箝、蟹掩，揭開蟹蓋。
2.剪掉蟹鰓、蟹肺等。
3.在蟹身中央對剪開。
老上海飯店（28279339）
地址：灣仔謝斐道238號世紀酒店地庫B1
營業時間：10:30am-11pm