港股噚日跌勢比預期為急，恒指29000大關失守，大跌1526點，期指更大跌1685點，低水166點，尾市個勢好弱，可能仲要跌多「浸」，有機會見27000至28000，可入市。
呢輪升得勁嘅獲利貨太多，跌得亦急，139控股（139）上禮拜3個交易日由0.44元升上0.72元，升近64%，噚日就借勢調整，跌番14%，正係低吸嘅大好機會，在0.60元至0.70元間整固，再破位而上，短線目標指向0.95元。
光大國際（257）近日好強勢，噚日一度逆流而上，高見4.27元，但終於被大跌市拖累，雖然跌到落3.85元，但都有力上番4元收市，只跌0.11元，跌幅2.6%，都算溫和。光國股價在4元水平消化已3日，成交亦逐步減縮，要留意，整固完成再上，第一個上升目標係4.80元。
08年盈利可倍升
光國在03年轉型，現時已成為中國環保企業的龍頭，旗下包括污水處理、垃圾焚燒發電、沼氣發電等項目合共已有14個，累計投資40億元，全部最遲在08年投入營運。
光國營運已漸入佳境，07年度（12月年結）營業額5.2億元，升43.2%，股東應佔溢利1.68億元，升94.6%，每股盈利5.44仙，升71.6%，中期派息0.6仙。
期內集團之垃圾處理量達21萬噸，污水處理量為1.3億噸。垃圾焚燒業務的收入主要來自發電及政府補貼，而污水處理收入則來自政府補貼，由於經營商有各種補貼，令平均股本回報高達15%。
下半年有3個項目投入營運，盈利提升，估計07年全年盈利約3.5億元，08年盈利可倍升至7億元，每股盈利0.245元，以環保及水務股平均25倍PE計，明年股價已可見6.10元。
中科有好戲上演
中國科技（985）昨日停牌，涉及重大收購事項，樓梯響幾日，已見人下來。中科有勁料，呢輪密密入股的基金亦陸續曝光，噚日呢個來頭更大，就係建設銀行國際資產管理，持有3.5億股，而且好大機會在市場繼續增持。好似建行呢類傳統基金都入股，睇得咁好，中科復牌後應會有好戲上演。