700呎鴨世界

童年帶給我們無限回憶，想重拾童真，有不少人都喜歡收藏兒時玩具緬懷一番。我們兒時的「冲凉伴侶」黃色小鴨早已成為流行潮物，以往只限在浴室出現，但這隻鴨仔，在屋主陳先生的家中直情游到出客廳、飯廳、睡房，無處不在。一屋鴨仔，唔使等冲凉都有得玩！

記者：葉雪芯
攝影：楊錦文、陳盛臣
Model：Yu@puremodels

細個經常玩的國產貨塑膠鴨，大多只是黃色，其實這隻小鴨早已衝出國際，游去世界各地，大紅大紫，還俘虜咗不少fans。家住大埔南圍村的陳先生亦是鴨仔的裙下之臣，在他的700多呎村屋中，就佈滿了大大小小的鴨仔。一入屋，在客廳已經見到一幅鴨仔牆，連咕𠱸、紙巾盒、掛牆裝飾等統統都是。如果你是第一次來到這間屋，最適合玩估鴨仔數目遊戲，不過真正的數目，陳生話多到連佢都數唔晒。「保守估計都有300件鴨仔產品，總之我一見到就會買㗎喇。」陳先生喜歡鴨仔的原因，除了是覺得它的樣子可愛外，仲有因為太太，他說：「我太太都鍾意鴨仔，加上佢個嘴扁扁哋有啲似呢隻鴨，所以令我更加鍾意鴨仔。」

■將由世界各地買來的塑膠鴨仔叠起，令這幅平平無奇的牆都變得色彩繽紛。

CD架角落遍佈鴨仔足迹，就連垃圾桶都是鴨仔，最誇張的左手邊一籃「鴨仔集中營」，裏面約藏數十隻鴨子公仔。

睡房採用暖色系，深紫色窗簾、紅色被單和少不了的鴨仔枕頭袋。

屋中有一道拱門是通向廚房和廁所，陳生用一串鴨仔門簾作遮掩。

連貓貓的跳架上，都放上兩隻鴨子毛公仔，做裝飾之餘又可為貓貓提供玩物。

陳先生是攝影師，去旅行時會帶埋心愛的鴨仔出遊，這幅掛牆畫就是他的作品，每張照片中都會出現鴨仔倩影，例如你會發現有隻鴨仔在湄公河暢游，又或泰姬陵屋頂上唞凉……

最耀眼的當然是客廳的鴨仔牆，總共有超過50隻不同顏色圖案的鴨仔並列，如彩虹、朱古力色、心心圖案等，比在香港見到的淨黃色更色彩繽紛。「好多款香港都無㗎，我哋鍾意去旅行時順便搜集埋，其中泰國和日本就最多。」
除了鴨仔，陳生還喜歡買designerchair，不過由於家居面積唔大，陳生會揀設計簡單的單座位椅子。飯廳中的一套四張座椅，外表平凡，原來大有名堂，正是出自名師CharlesandRayEames手筆。「呢套designerchair其實係朋友喺美國買番嚟，價錢比香港家具店平少少，我最鍾意CharlesandRayEames嘅設計，因為實用又耐用，款式唔會好誇，好啱香港面積唔大嘅家庭。」陳生仲教路，如果要買designerchair，不妨上網bid二手貨，分分鐘在外國會買到筍貨咁話！

陳生喜歡收藏Lego公仔，客廳牆上的透明收藏架，便擺滿私人珍藏。

飯廳的一套四張座椅正是名師CharlesandRayEamesPlasticSideChair二手貨，用玻璃纖維製成，椅上有交叉花紋，設計經典。（一套四張約$4,000）

另一張二手CharlesandRayEames紅色SwivelChair，陳生說是他的貓貓專用。（約$1,000）

影相是陳生最大興趣，在客廳另一角有他去世界各地時所拍下的作品。

陳生的黃色小鴨在他的家中隨處漂浮，原來仲有另一批鴨仔漂流在世界各地。1992年，一艘運載玩具鴨到美國西雅圖的中國貨輪在北太平洋阿留申群島遭遇暴風，船上約29,000隻黃色小鴨散滿海上漂流「歷險」，至今已有15年！這批鴨仔還被美國海洋學家認為有助研究海流動向，於是展開追蹤。29,000隻鴨仔中，部份被冲到澳洲、印尼等地海岸，小部份被困在北太平洋的北極，還經歷過冰封。美國一些玩具生產商更曾懸紅尋找，每隻值約780港元獎金！

黃色小鴨國際漫游，紅到去日本，最近日本的GA-KO鴨仔同我們兒時所玩的黃色小鴨好似一個餅印咁，𠵱家仲紅返嚟香港，其中一些家品更大受歡迎，即刻搜括晒佢哋出嚟！

B）廁所刷咁靚，真係唔會捨得用。$175/a

C）絨披肩連帽，大人小朋友都啱。$128/b

D）這個唧唧膠樽，放沐浴露或洗手液都得。$58/b