「住好啲」G.O.D.踩界，銷售印上類似黑社會團體名稱嘅T恤、明信片等等，銷售兩個月後，因突有報紙報道，O記睇完報紙之後，次日就採取行動，到店舖拉人（《南華早報》於十一月二日如是報道），成為香港大新聞。我哋成班老友在陸羽飲茶，挑起話題嘅竟是識幾句廣東話──尤其是粗口──嘅餐廳R。餐廳R每次駛車經過禮頓道去跑馬地，對G.O.D.嘅牆上廣告「DelayNoMore」，非常反感，認為係badtaste（壞品味），平時亦對G.O.D.呢個名字好唔鍾意。對外國人嚟講，開上帝玩笑，唔係佢哋一杯茶。
即管如此，佢認為警方大陣仗到極，搵埋傳媒去現場影相，未免浪費警力，浪費時間。《南華早報》嘅漫畫最到肉──警察拉賣T恤人士而唔去拉真正黑社會成員。律師W認為警方未必可以charge（控告）「住好啲」嘅設計，將來上到法庭有排拗。
法律顧問顯然有兩派意見。聽講無綫電視問過法律意見後，T恤名字照播無誤，但有線與亞視就打格仔。報紙方面，《蘋果》《南早》啲圖片原汁原味，一啲報紙就以「十XK」見報。既然法律意見不同，官司就打得成，納稅人嘅錢就係咁樣用嘅。
大家傾到興高采烈之際，忽見退休已久嘅警界高官自貴賓房行出嚟，我哋同佢打招呼，退休警官話：「咁bigdeal呀，我今朝早晨聽見電台講呢單新聞，覺得使唔使咁大陣仗呀？呢啲嘢，以前打個電話去，警告一聲就得啦！」就係囉，點解呢次警方為賣出咗十幾件T恤嘅事情咁張揚呢？譬如禁煙，一啲酒吧可以得到豁免，於是在入口大門上釘咗一個牌，示意在內可以吸煙。唔使幾日，酒吧立即收到政府警告信，酒吧當然聽命，拎走所有暗示可以在內吸煙嘅標記，唔使勞煩禁煙辦聯同警察上門拉人。或者現在啲話事人作風與上一代不同，鍾意做嘢都未定！