錦上峇里　冷燒謠

恒指節節上升，氣溫話跌就跌，有錢令人身痕、天凉令人眼瞓，我又想放假了。
放假有十萬個好理由，卻找不着一個好時候，喂你有project跟緊╲你同事大假未放完╲你今年爆晒quota喇，心動容易行動難，4日3夜逍遙遊近乎高不可攀。
近近哋，食自己，想享受resort式悠閒，毋須仰望布吉與峇里，上車、入滿油、爽快一腳踩去元朗新場，但見樹影婆娑、水波蕩漾，星光之中迎來美酒伴泰菜，加上郊外無臭天然凉風全程輕送，要好好感受這一晚。

記者：劉嘉蕙　
攝影：梁細權
Model:Zoe（TheGroup）,Jolen

300萬resort風情

話說記者是九龍妹，最怕入元朗左兜右兜唔知自己去邊，首趟拜會旦王花，剛巧天降冷雨，我一個人、黑麻麻、在大欖隧道口呆等半個鐘等人接，忍不住面黑黑嘴藐藐獨自嘀咕，「好巴閉咩開咁遠？」
終於中間人出現，上的士掟轉彎，旦王花招牌映入眼簾，看見長方形水池、噴水象象與大棵棕櫚樹向我招手，立即轉怒為喜，大叫unbelievable。
旦王花環境好舒服，皆因老闆大灑300萬搞裝修，誓要在石屎森林打造度假resort風情。Resort感，最忌眼高手低到喉唔到肺，局埋一堆懶精緻軟件迫人Relax，幸而旦王花沒有犯以上流弊，萬多呎戶外花園鋪木地、擺放長木枱與藤椅、加上開放式winebar及專人主理燒烤區，場地規劃闊落有致，五臟俱全。最最最重要一點，環境無遮無擋夠開揚，見山是山聞風是風，如此自然空間感市區難尋，不枉一番山長水遠。

■場內獨一無二帳篷位，氣氛十足，情侶與朋友把酒談心皆宜。

輕談淺酌吹水煙

菜式方面，旦王花是泰屋集團旗下產品，專攻泰越菜，同時打磨多款fusion口味，又設燒烤區供應時令食材，連非大路嘅魔鬼魚及泰國茄都有得燒。餐廳winebar部份亦是驚喜主打，雞尾酒list長長一串，12nn至9pm歡樂時光全部半價，最近更引入土耳其特色生果味水煙，一班人晨早霸個帳篷位，飲飽食醉吹吹水（煙），身心特別舒暢，回家睡個好眠。