有讀者聘請傢俬設計公司進行全屋裝修及訂造傢俬，單據上寫明工程收費17萬餘元，惟收屋時發現有20多處需要執漏，且突被要求多繳付1萬1千多元額外工程費用，事主感不合理拒絕支付，多項執漏被拖延近半年仍未完成，她感有關店舖經營手法有問題，已向消費者委員會投訴。
麥小姐今年2月聘請位於北角渣華道的IDEA.JInterior&FurnitureDesign，為其何文田的住所進行全屋裝修工程及訂造傢俬，惟5月「收屋」時發現有20多項工程要執漏，令她非常不滿，「我列張執漏清單畀佢哋，包括：鋁窗開關把手同鉸位鬆脫；整斷原本嘅電線嚟就位，搞到電視有雪花、上網唔穩定；廚房仿石枱面有花痕、顏色唔平均；燈掣批得唔好、油色唔同；房同廳之間嘅假天花有裂痕；床下底嘅木有水迹；鞋櫃門爆玻璃、開門位𠝹手；廁所門難開關，試過困住嚟上門檢查嘅師傅……等等，咁多問題，工程真係做得好馬虎！」
擅自加做雙面櫃
最令麥小姐氣結的是，在洽談工程時，該公司跟她計算好整項工程費用為172,280元，並寫明為「全包工程」，包括木工、泥水物料，惟收屋時卻向她額外徵收11,384元，「呢筆後加數包括買雲石料同做一個價值近八千蚊嘅廁所雙面櫃，我根本無叫佢做個廁所櫃，而其他買枱面雲石同床尾玻璃嘅錢，就應該係全包工程之內。」
麥小姐認為有關額外收費不合理，遂拒絕支付，「可能我唔肯畀筆錢，佢就一直拖住啲執漏，到𠵱家我收咗屋半年，仲有5、6項好大問題嘅『手尾』仲未解決。最離譜係全屋黐喺牆做裝飾嘅磨砂玻璃有抹唔甩嘅污迹；廁所門關門之後有條成1cm濶嘅隙，可以由外面睇入去，另外洗手盆對上嘅大玻璃鏡，鏡裏面有啲好似水印嘅跡，佢哋拖到𠵱家都未整！」
本報將麥小姐的投訴分別透過電話及傳真向IDEA.JInterior&FurnitureDesign反映，惟至截稿仍未收到該店回覆。檔案編號：0920002
消委會意見：詳列工程圖樣用料
消委會發言人表示，通常大規模的工程如全屋裝修，商店會分期收款，有需要時一定與客人商討有關材料或項目安排才訂貨，並開展工程，店方絕不可以擅自增加工程項目及加價。
該會近年接獲市民投訴裝修工程的事項主要涉及貨不對辦、延伸完成工程或遲交貨等事宜。發言人提醒市民要與商店以白紙黑字在單據上列明工程項目、尺寸、用料及圖樣，遇事時避免爭拗。
投訴裝修工程數字
年份：07（1至9月） 數字：190宗
年份：06 數字：209宗
年份：05 數字：249宗
資料來源：消委會
業內意見：驗貨後理應執漏
香港名設計師協會成員陳禮善表示，商店有責任在竣工後驗貨及執漏，以滿足顧客要求。門隙闊、磨砂玻璃內有污迹等問題事出有因，但有補救方法，商店不作執漏，便處理不當。
門隙闊達1cm
執漏原因：把門的尺寸度細了
補救方法：更換加闊1cm的門
執漏原因：天花板與櫃有裂痕
批盪要含水份以溶合，當天氣轉變會出現批盪收縮，引致現裂痕
補救方法：在接駁位加一些如玻璃膠的「填縫膠」
浴室鏡內有水印
執漏原因：錯誤使用含酸性的膠水或使用太多雙面膠紙
補救方法：更換玻璃及使用不含酸性玻璃膠
