樓市反彈，長實喺天水圍嘅栢慧豪園，9月份短短一個月賣出近1900個單位，示範單位功成身退，睇遲一步嘅準買家，不妨轉戰屯門新樓貨尾豫豐花園。近排嗰區二手樓市㷫烚烚，炒家、用家齊齊搶貨，唔想落後就趁禮拜日入去睇睇，聽代理講呢個盤仲有唔夠300個貨尾，平均呎價3000蚊左右，發展商𠵱家仲有送釐印、律師費等優惠，幾時停送就未知。
入開屯門睇樓嘅朋友，可以順道去青山公路嘅黃金海岸商場行個圈，周日除咗有定期嘅特色攤位展覽，同埋每月第一個禮拜日舉辦嘅有機市場之外，仲有近期Hit到爆嘅拉丁舞表演㖭，早排一齣以拉丁舞為主題嘅電視節目播出後，舞蹈熱潮一發不可收拾，主辦單位趁勢邀請世界著名嘅舞蹈家喺商場翩翩起舞，同時免費提供西班牙特色美食，雙重享受拉丁風情。
