中旅（308）由大奇迹日到家陣，狂升66%，同類股九洲發展（908）只係升咗23%，九洲平到爆。九洲最新NAV1.02元，現價（0.9元），P/B只係0.88倍，中旅升到現水位，家陣P/B高企3倍，九洲相對好抵。
要咁睇，呢期紅籌國企玩注資，中旅P/B高，主要係市場憧憬會陸續獲阿媽注資。九洲又點？九洲頂頭控股係珠海國資局，珠海市有超筍資產，肥水不流別人田，九洲肯定係注資對象。九洲P/B咁殘，斷估都要壯大成間企業嘅市值，先有機進行注資。
再講，中旅往績PE80倍，預期PE講緊40倍樓上。就當九洲07年度（12月底止）PE維持番往績20倍水位，都平過中旅一半，更何況九洲旅遊景觀業，喺下半年發力，九洲07年度PE17、18倍，應該無問題。博九洲翻半番到1.35元，P/B都係講緊1.3倍，未有耐追到中旅。
天價賣地 泛海得利
泛海（129）食正天價賣地熱，計劃推出嘅樓盤，肥過肥仔水。泛海香港仔大街項目總樓面14.3萬平方呎，已經有報道話，泛海計劃意向呎價1萬銀。就當樓面7成係住宅，純利率25%，計計數，淨係呢個項目，已經可以為泛海回籠10億銀，純利達到2.5億銀，現價（0.295元）折合PE8.6倍。中線博泛海翻半番到0.44元，預期PE不過12倍水位。