疑因撰寫報章專欄激怒無綫高層而被雪藏的袁彌明，昨日在九龍灣行catwalk，提到與無綫的合約問題，她表示昨早已發律師信給陳志雲。袁彌明說：「無綫喺呢段期間，幫我推咗好多工作，令我損失好多。第二就係合約寫明工作完成後30日內會過酬勞，但到𠵱家都未有，我係等住用啲錢交稅。」
「我當解咗約」
袁彌明續說：「我覺得呢間公司都唔係保障藝人，我只係想盡快解決件事，我𠵱家個心態係當解咗約，除非佢哋有合理理由唔畀我解約。」
對於杜琪峯批評陳志雲的言論，她說：「我不嬲都覺得杜Sir講嘢好啱，陳生作為總經理去主持《志雲飯局》，真係請到好多吸引大家嘅嘉賓，係做得好好，不過又真係好諷刺囉，係咪即係其他主持青黃不接未夠班呢？你作為管理層你都要負責任，冇理由要吓吓都揹住個總經理title去約人做訪問㗎！」
此外，曾直言對無綫心淡的王賢誌昨日在電話中說：「我好欣賞杜琪峯呢個人，但佢講嘅人同電視台係咪騎呢，見仁見智，我覺得佢講嘅其他說話都不無道理。」
採訪：駱華齡 攝影：葉君海
鄧健泓：志雲大師冇問題
杜琪峯大罵陳志雲不認真解決無綫劇集水準低劣問題，有藝員大表認同，但也有人為陳志雲護航。
鄧健泓：TVB唔騎呢，運作正常，做嘅節目受歡迎，但每個人都有自己意見，我對杜琪峯嘅睇法不予置評。我哋呢行係娛樂人，志雲大師做節目冇問題，最緊要好睇啫。
葉翠翠：TVB係個大家庭，有自己文化同教育，我唔會批評人哋家庭，當然每人都有自己意見，踩低人哋惡意中傷，可能過激，善意嘅TVB絕對歡迎。我唔覺陳生騎呢，見過佢幫奧比斯義賣T恤企足6個鐘，佢係個好出力嘅人。
林峯：我對杜琪峯嘅說話唔評論，但我覺得陳生做幕前唔係壞事，起碼有個高層知道做幕前嘅會遇到乜嘢問題，會了解運作。我喺無綫9年，呢幾年公司青春氣息多咗，好壞唔講，但最少做出好多新嘗試。
