孫耀威
冧聲沙玉置浩二
「睇咗咁多演唱會，我最欣賞嘅係玉置浩二，因為佢把聲真係好有魔力，好吸引人，我一聽到佢唱歌真係起晒雞皮，同埋我自己唔係咁鍾意聽完美靚聲，相反把聲沙沙哋仲吸引，玉置浩二就有呢個特質喇，我仲視佢為一個學習對象。」
採訪：李珮洳、駱華齡
張繼聰
大讚陳奕迅出色
「如果以土炮演唱會來講，我最欣賞陳奕迅（Eason）今次個演唱會，因為睇得出佢成件事好畀心機去做，所有企喺台上面嘅人都好出色，成件事簡直係goodtaste呀，加上個舞台好靚，坐喺台下面睇個感覺一流，我認為呢個騷直頭有國際水準呀。」
江若琳
小豬個唱最感動
「令我最深刻嘅演唱會一定係羅志祥（小豬）嘅『愛的力量演唱會』，雖然我唔係親身喺現場睇，只係買DVD，但就令我相當感動，因為以前眼中嘅羅志祥只係識搞笑，但喺演唱會中就發覺佢樣樣掂，跳舞、打鼓、彈鋼琴，真係又可愛又靚仔。佢喺演唱會中仲預留咗一個空位畀佢已過世嘅父親，仲話自己等咗11年先出道，但父親就無緣見到佢喺台上，佢邊講邊喊，我就邊睇邊喊。」
衞蘭
TheCure搖滾到爆
「我睇過最好嘅演唱會一定係前幾個月喺香港亞洲博覽館舉行嘅英國PunkRock樂隊TheCure『ANightWithTheCure』演唱會。我一直好鍾意佢哋嘅音樂，細個時爹哋仲係用佢哋嘅音樂叫我起身，加上我覺得個主音好靚仔同好型。有時睇演唱會最重要係識晒啲歌詞，我就真係全部都識晒，所以睇得好投入，全程企起身係咁跳，原本我仲有機會識到個主音，但最後佢話太攰先無緣見面。」
