第一個問題：和RafSimons晚餐，你會着RafSimons嗎？
雖然我也很喜歡這位「當代男裝立法委員」，但如果有得揀，初見設計師本人，我寧可不穿RafSimons。
由頭到腳fullgear上陣的話，designer當然收到這份尊重，零售商與PR公司應該更加歡迎，但你着RafSimons又怎會着得贏模特兒呢？
所以最多我會穿一點點Raf，再與其他東西mix&match，試圖讓他覺得你將他的衫「穿活了」。成敗難測，但套路至少比較高章。
不過更多的時候，我會揀一件非Raf但預計在他審美觀之內的東西，一些「我估他覺得靚」的其他牌子，萬一博到他問「你呢件乜嘢嚟？」就威咯！好像你明明很想認識人家，卻引到對方先開口一樣。
結果呢，我失敗了，RafSimons和我點點頭，握握手，HelloHelloNicetoMeetYou，好Nice，他真的好Nice，但無其他。
然後回過頭又再繼續與主辦者連卡佛的大員談下去了。
那一刻，我多麼羨慕一埋位就有人來不及自動開掣真情剖白BlahBlahBlah的……陳志雲。
街童王
來自湖南省的新發商人會千里迢迢拿着大磚銀紙來港買DiorHomme，而不是RafSimons，但講起對當代男裝波長震幅，Raf的影響力未必低於Hedi，大家都擅長將民間小菜搬上大枱，講早出道，Raf還要早個幾年，這位真人比上鏡高瘦的比利時人當年如果沒有在花都一夜成名，Streetwise不知道幾時才有機會變成HighFashion？Raf最拿手將街頭元素用最矜貴洗煉的方式再呈現──倫敦暴風少年的BomberJacket、柏林地下電子樂隊的細膊西裝、巴黎無業遊民的游擊隊圍巾……他三兩下手勢就是煉成料靚做工好價錢萬萬聲的華衣，遠看仍然是流落歐洲街頭的慘綠少年，行近驗屍咁驗，竟都是毫無破綻的高級工藝品，爛泥不只扶上壁，還成了有紋有路自成一格的浮雕。
人，他一樣用這種巧手靈心提拔成材。有個叫做RobbieSchnelder的街童，當日就是被RafSimons相中，拿着Raf給的咭片，一步步上了大師為他鋪路的時裝神枱，首先擔任RafSimons的御用模特兒，行飽catwalk影夠封面之後，Raf甚至給他做了品牌的總經理、代言人兼生招牌，一直只知坐在我右邊那個溫文爾雅、一發現枱面那盆coldcuts原來是豬頸肉差啲嚇到跌筷子的人是似乎和我傾唔埋的RafSimons大王，忽略了就在我左側一口Flemish口音英文的黑衣人，原來就是我從Raf天橋show與特刊封面見過百次的RobbieSchnelder先生，幸好他捲袖，我終於認得他手肘上的紋身，也幸好他吹得，俾我問緊「喺RafSimons返工，俾同事發現你着AnnDem大鑊唔大鑊？」RafSimons側耳聽到這段對話內容，決定插嘴講埋一份，我一早預備好的蛇，才有機會隨棍上。
上呀！
士芒語錄
「我自己都着其他牌子嘅衫，都冇事。」Raf先生終答嗲。
「咁你即係好鍾意shopping啦？」我先放出一條蛇。
「No,Ihateshopping。」
「咁你啲衫點得嚟？都要去買啩？」
「一季只去一兩次，同一間shop，買同一樣嘢。」
「即係乜嘢，我見你𠵱家着緊件黑色knitpullover，好似有好多件吓喎？」另一條蛇又出洞。
Raf執住心口件衫，「這件JilSander我有20件一模一樣的（我問：JilSander你都要買，但佢聽唔到，冇應我），裏面CommedesGarcons黑恤衫我都有20件，（指指條褲）呢條Yohji褲都有10條。」
畢竟是時裝設計師，講起衫始終份外眉飛色舞。「有乜嘢色你係唔會着上身嘅？」我又問。
「幾乎只着Navy和黑。」他又再執起自己的心口一次。
「咁有乜嘢色你係唔會着上身呢我嘅意思係。」
「Green……（諗咗好耐）……同埋Pink啦……再諗……同埋Brown。」
「係呀係呀我又係，我都唔係『啡人』嚟㗎，咁Beige你都睇怕唔得㗎啦，因為我都好憎㗎，你知中國人skintone同Beige唔係好夾，唔怪得知咁耐以嚟你的collections都好少用Beige啦哈哈哈……」講到呢度，我先醒起出事，一輪嘴咁，我似乎未停過。
好在有條個口擘得更大、嘴形更「O」的桂魚剛蒸起上桌救了我一命，Raf拿着隻羮指住個碟：「ThisFishisGood。」
第一節完。
飯鏟頭
又隔了半小時，今次我擺明放蛇，放在口袋中的飯鏟頭無棍隨都要上：「點解安蘭街間RafSimonsShop搞搞吓又開唔成？」
一路聽說這個人唔多講嘢或者講都陰聲細氣，好明顯全部是流料，這一幕，他表演了少少激動：「係啦，講好晒又畫晒圖，中間又再改幾次，你知我個人要啲嘢好specific㗎啦，結果裝修者都係話做唔到我要嘅效果，所以不如不開了。我係一個好honest嘅人，直腸直肚乜都要講晒出嚟先得嘅。總之呢個shop嘅計劃暫時cancel咗。」
「咁去到最後，仲有冇計劃在其他城市開史上首間RafSimonsShop呢？」
「有，喺東京，傾緊。」
係咁，有謂的事只係傾咗咁多。
本周後話
其實最憎食社交飯，萬大事飲餐茶都傾完啦，再唔係約食lunch進可攻退可守，勢色唔對，馬上走人。
無必要約晚餐，掛住傾嘢啲嘢一定凍晒唔好食，好食都無心情㗳真；正如賣身不獻吻的妓女，有些部份只留予心愛的人。今次晚餐肯去，只因佢是時裝界的關正傑，才破例。
但有趣的人幸好還是有些，不知我還會破幾多次例呢？
Textby黃偉文
