鄧健泓紅，紅在主持《味分高下》終極戰、獲175萬家庭觀眾捧場？不盡然；紅在與無綫總經理陳志雲建立甜如蜜糖的美味關係，應該更真實。
揸弗《志雲飯局》及《志雲上素》的陳總，先後捧過崔建邦和王貽興，自從新寵鄧健泓入局，志雲味分高下的今回合勝出者，非陷谷底三年的鄧健泓莫屬。
被無綫冷待過的鄧健泓，如今躍升大紅人，那怕別人嘲諷擦鞋，還是要公開鳴謝陳總「執」他回來；但傳不和的崔建邦不是深交，至於王貽興這位點頭之交，在他眼中，則應續演深度節目。
此雲彼泓惺惺相惜後，鄧健泓的味道，的確唔同！ 採訪：朱倬誼
風雲篇──起跌有時努力自身
鄧健泓說：「人生，總係有高高低低，冇人永遠好晒，亦冇人永遠唔好。諗番呢11年，我唔係無端端有今日嘅機會，係有畀心機做嘢㗎。」
絕地反彈的鄧健泓，96年入行，到現在33歲才平地一聲雷，由無綫高層陳志雲帶領入局，主持《味分高下》後，再破格與正東唱片達成共同擁有鄧健泓經理人合約的協議，安排他重踏歌壇，此後拍劇、做騷、做主持機會浪接浪，以「蜜糖」形容陳總的鄧健泓人氣急升。崔建邦和王貽興？請靠邊站。
狂讚陳志雲有深度
獲陳總帶挈，鄧健泓機會多，但閒言更多。傳他倆關係曖昧，他擦鞋，崔建邦和王貽興被搶job，他都聽過。「陳生畀好多機會唔同人，我有乜嘢能力可以搶晒佢哋嘅工作？《最緊要正字》，我一定做唔到！崔建邦，我同佢冇問題，大家覺得我哋好似仇人，真係冇，我唔係取代佢，只不過暫時性做吓《勁歌》啫。唔通唔做咩？演藝係我工作，俾人鬧、俾人插，亦係呢份工作嘅nature（特性）。」
沒有陳志雲提攜就沒有今天的鄧健泓，鄧健泓對陳總有讚冇彈：「我覺得陳生𠵱家係TVBicon，呢個純屬個人意見，佢又叻、口才又勁、轉數又快、讀書又叻、語言又勁，基本上佢係一個好有深度、好有資歷嘅勁人。如果我有乜嘢問題，做得唔好，佢會話畀我知，有乜嘢唔好會提點我，我好多謝佢執番我返嚟。」
做咖喱啡跌落谷底
能跳升成陳總愛將，其實緣於五年前，鄧健泓說：「02年尾我去TVB8發佈會，陳生上台講嘢時，佢嘅用詞、演繹方法，好似棟篤笑，我覺得佢係子華哥之後嘅另一個，嘩！一個高層講嘢咁勁嘅？04年我同TVB傾約，因為我miss過一啲機會，所以今次陳生想畀番機會我，我諗佢睇到我努力，我唔係呃飯食，我做咗11年，爭嘅可能係機會同天時地利人和嘅配合。」
鄧健泓星途浮沉，今年大落大上都夠神奇，年初他離開漢傳媒，3月重返無綫時還行行企企，參演劇集《兩棲時代》佔戲少，《我的野蠻奶奶2007》演職員甲乙丙，半年後，他走紅速度竟快過穿梭機，但回想做咖喱啡，直言不開心：「點解我會咁嘅？公司話希望我唔好靜喺度，但我從未試過拍劇拍到咁低，真係唔好受，好彩未完呢個劇，新希望就開始，就係做《味分高下》，呢個係07年大躍進嘅轉捩點。」
冇畀家用唔係男人
其實02年唱《朋友二號》時，鄧健泓紅過，但04年開始低潮，先和原子鏸甩拖，當時TVB政策不容藝員和唱片公司合作，遂轉投殼王陳國強的漢傳媒懷抱，同時間TVB轉制，藝員可以出碟，正是他所說的錯失機會，他苦笑說：「喺漢傳媒時幾迷茫，06年拍咗個內地電視劇收唔到錢，都有六位數字，唔係漢傳媒唔畀錢，係聯絡人set份合約模糊，拖咗幾個月。」
「Marsha（原子鏸）離開時最痛心，04至06年乜嘢都唔順利，我有諗過跳樓，但覺得好低能，跟住三年幾唔知做過乜，好似冇咗生活，06年尾經濟唔好，慳住使，唔敢出街，嗰幾個月我覺得自己唔係男人，因為冇畀家用，好難過！」
愛情篇──至愛遠走再覓知心
鄧健泓七年愛過兩個女人，一個是眾所周知拍了四年拖、身材勁過原子彈的原子鏸；另一個是公開但不能說的秘密：李詩韻，但相戀都快三年。
年半前鄧健泓接受訪問時誓言最愛原子鏸，奈何熱情冷卻，今天倒變得輕描淡寫：「我會記得以前嘅開心片段，呢個人對於我嚟講，我好似唔再認識佢，一個冇乜嘢感覺嘅女仔，唔會掛住呢個佢，但會祝福佢。」
念狗多過主人
鄧健泓形容原子鏸是不算好朋友的朋友，但由熱戀變成陌生，竟源自一頭小狗Seth，那是他們拍拖時一起飼養的貴婦狗，分手後歸女方撫養。幾個月前原子鏸帶牠移民上海，鄧健泓知道時，人和狗都走了，所以不難明白他不再掛念原子鏸，鄧健泓還說：「Seth，我好愛佢，好掛住佢，永遠永遠都咁愛佢。」念狗多過念人。
原子鏸跟鄧健泓恩斷義絕，他也淡然：「我同佢一齊時對佢好好，再之前嘅女友，到𠵱家我有乜嘢唔開心，佢哋都會同我傾，反而佢唔會。佢都會慰問吓我嘅，through人哋個口。」
先搵錢後結婚
提到現任女友李詩韻，鄧健泓只肯認她是好朋友，他選擇發展地下情，有大條道理解釋，但不外如是：「之前我乜都冇，我連屋企人都面對唔到，又點樣面對身邊人？我會令身邊愛我嘅人都快樂，我希望做到最好，我係一個大男人，令身邊人滿足、開心，我會好自豪，所以我將工作睇得好重，私人嘢可以唔講就唔講。」
李詩韻曾陪鄧健泓度過他人生中的低潮期，所以他認為對方是個好女仔：「我會好珍惜，好記得以前唔順利嘅時間，邊個朋友支持過我，包括李小姐。我希望嚟緊幾年可以有穩定收入，先諗結婚，事業未明朗，點定婚期？」
敵友篇──品評對手各有長短
由無綫總經理陳志雲做中心點的關係圖，源自他一手捧紅王貽興和崔建邦，舊將王賢誌失勢敗走亞視，新寵鄧健泓踢走王、崔二人上位，五個男人七國咁亂，鄧健泓眼中的「雙王」及崔建邦，友情level各有參差，是友是敵，僅一線之差。
王貽興「應該做深度節目」
「王貽興好靚仔，唔係好熟，點頭之交啦，但佢一定係一個好有才華嘅人。好早之前我同佢合作過一次，嗰次佢話畀我知出書，我話如果我出書又點？佢畀出版商嘅電話我，我記得嗰次係港台節目去澳門拍外景，嗰時佢未曬黑，亦都未咁大隻，好似係攣頭髮嘅；幾年後再見佢已經變晒樣，黑晒、靚仔晒。王貽興係才子，應該繼續做啲有深度嘅節目，唔好嘥咗自己嘅才華、文筆。」
崔建邦「仲未去到講心事」
「同崔建邦熟啲，我哋合作過好幾次，我幾欣賞佢做主持嘅信心同輕鬆程度，好自如、好駕輕就熟、好犀利！佢畀我感覺好淡定、好有經驗，有時我講錯嘢，佢會幫我兜番，佢係好出色嘅主持。崔建邦係朋友，我哋有sendsms，我第一晚主持《勁歌》，佢同我講goodshow；佢上山（玉珠峰）前，我sent祝福畀佢，我同佢真係冇人哋講嗰啲一定不和，但又未去到講心事，我緊張時佢安慰我。」
王賢誌「佢有壓力要克服」
「以前我做兒童節目主持，因為王賢誌同蔡子健熟，我哋有一齊食過飯，唔係話真係好熟，我哋見到面會打招呼。佢好有理想、好有幹勁，我希望佢可以好順利，做到自己想做嘅嘢，我覺得佢都算係一個朋友，我有睇少少《亞姐》，唔係睇晒成晚，喺《味分高下》賣廣告時轉去睇吓，佢OK，會有壓力，但每一個人都有一定壓力，佢一定可以克服到，佢做得幾好。」
