蜘蛛俠Fans可能一早就買咗第1、2集的DVD，仲等緊買第3集？新上市的《蜘蛛俠3》Blu-rayBoxSet，一套已經有齊3集。第3集中本來是正義之士的蜘蛛俠，竟然被不明物體感染，由正變邪，由外表到性格都變成黑色蜘蛛俠。是次敵人不但是Sandman和Venom，仲有自己㖭！加上殺出新歡Gwen，複雜度幾何級數上，睇得過癮好多！
記者：馬靜兒 攝影：譚盈傑
第3集靚過頭2集
BoxSet有齊3集，AVConsultant的AlanLee試睇過，發現第1集畫面矇咗少少，第2集就清好多，但光位層次較少，有出現爆光的情況，但流暢度都OK。至於第3集，畫質好好多，「通常大片都有較多資源做後期製作，第3集差不多沒有雜訊，畫面好亁淨。整體來說畫面屬平均的高質素，只是偶爾一、兩個鏡頭出現極少的雜訊。」
試膚色
好自然，無出現一笪笪的情況。
試光暗
黑位很好，暗位的層次多。但光位有少少爆，推得太盡，額頭位快要Over。
試顏色
色彩豐富變化多，但一樣睇得舒服。
試流暢度
偶然在快速動作時，背景睇得不太清晰。
試雜訊
畫面好亁淨，沒有雜訊。
紅黑蜘蛛 亦正亦邪
頭兩集大家就算無入戲院睇，都肯定睇咗碟啦！最關心的反而是第3集，因為今次有黑蜘蛛嘛！蜘蛛俠今次弊傢伙，在一次拯救行動中不幸纏上外太空不明物質，慢慢被其蠶食並受其控制，最初的紅色戰衣更變成黑色，漸漸心智亦受蠶食。失去原有本性的蜘蛛俠內外受敵，除了要應付Venom外，好友Harry為報父仇，不停追殺蜘蛛俠。殺蜘蛛俠叔父的Sandman比蜘蛛俠更強勁，處處進逼！Peter自從被感染後，連性格都變埋，貪新戀舊，周旋在舊愛MaryJane及新歡GwenStacy之間，到底蜘蛛俠能否戰勝心魔，挽回他至親至愛的人呢？大家睇碟時，有幾個位唔睇唔得，記得落足眼力！
感動位
好友Harry死去，身為朋友的Peter和MaryJane點會唔傷心！呢個位真係流咗兩滴眼淚。
震撼位
鬧市的運沙車突然出現五層樓高的Sandman，嚇得途人四散。
爆笑位
蜘蛛俠由紅轉黑後，整個人由戇直變成古古怪怪，性情大變，居然在街上和酒吧大跳大叫，似足小丑。
驚險位
MaryJane被困半天吊的士中，靠蜘蛛絲拉住，差點就變空中飛人！
浪漫位
Peter和MaryJane瞓喺超大蜘蛛網上曬月光，女仔點會唔冧！
發泡膠做Sandman
每次都唔少得的BonusTrack，講吓自漫畫演變成電影，點樣構思戲中的Sandman和Venom兩奸角，特技效果係點做。其實，整齣戲大部份都是Sell特技效果，話晒是大片，製作當然認真啦，難為幾位主角吊上吊落。不過，最得意都係Sandman，原來沙的效果用發泡膠粒粒造成，好似小朋友玩嘅魔術貼喎！
《蜘蛛俠》Blu-rayBoxSet
售價：$468
查詢：年代（23993973）
