最新民調數據顯示，陳太可能只係險勝葉劉一個馬鼻，稍有差池墮馬都唔奇，呢個消息真係好震撼，不過各位陳太fans唔使太擔心，八方帶個好消息畀大家，陳太噚日抽中候選人編號7號，即係luckyseven，係好冧巴。
7對4 金剋木
陳太外號四萬，不過4號卻俾葉劉抽到。雖然死死聲，不過葉劉話唔信邪，好彩抽唔到2或者3呢兩個不祥數字。玄學家吳佩孚同八方講，7號屬金，4號屬木，金剋木，所以陳太始終「食」住葉劉，若然順順利利，陳太轉守為攻重鎚出擊，隨時將對手殺個片甲不留。吳師傅又指按今年流年計，7代表文昌星，主人緣、功名，有利拉票、角逐公職，反觀4號屬一白星，人氣、人緣都略為輸蝕，「抽中呢個號碼就差啲喇，對住陳太有啲蝕底。」佢又指今年2號當旺，所以2號候選人李永健隨時係黑馬，雖然跑出機會唔大，但攞到嘅票數可能有意外驚喜。
另一位師傅麥玲玲屈指一算後，同八方講咪開心住，佢指陳太年初生日，條命屬金，7又係屬金，兩者相冲代表多爭拗，辦事唔多順暢。「陳太參選可能引起好多是非，會成日俾人攻擊。」又係喎，陳太近日講乜都俾左仔鬧，麥師傅咁講都唔係冇道理，批中晒。至於葉劉，麥師傅話葉劉命中欠木，4號屬木，所以抽中呢個冧巴，對佢真係大吉大利，「點計呢個冧巴都好旺佢。」
揀紅色 旺陳太
麥師傅講開又講，贈多兩句畀八方，佢話𠵱家開始行八運，七已經過氣，所以抽到呢個號碼都幾閉翳。不過佢話五行對選舉影響有限，最緊要係條命生得正，佢未相過陳太所以不便貿然評論，但係照計紅色旺陳太，陳太繼續用紅色助選應該大有幫助；至於葉劉，佢話用綠色、黃色都適合，會諸事順利咁話。
有高人指點，八方多口問埋其他候選人形勢，麥師傅指雖然𠵱家行八運，不過抽到8號嘅何來都唔好以為有運行，因為要同命格配合先相得益彰，如果唔係求利，只為求名，咁呢個冧巴應該可以幫佢大大提高知名度。其他號碼又點睇？麥師傅好坦白咁講，以現時形勢睇，其他冧巴候選人都係麻麻哋，唔使點睇㗎嘞。