褚簡寧嘅《不中不英》甚為暢銷，左丁山買咗幾本送畀讀緊中六中七嘅小朋友，其中學生Y已經成本刨完，究竟吸收咗幾多，要佢自己先至知道。呢日左丁山將李柱銘篇「China'sOlympicOpportunity」，以及詹德隆嘅譯本文畀佢睇，作為《不中不英》之輔助教材。才女毛孟靜話《華爾街日報》係美國極右翼報紙，所以佢平時唔睇。此言差矣。《華爾街日報》嘅評論版係美國保守派，香港叫做「自由市場不干預派」，經常與贊成共產主義、社會主義思想之學派「開戰」，但《華爾街日報》啲記者報新聞，一啲都唔右，久唔久就會出現與社評立論相反嘅報道，可見人哋真正尊重新聞自由、編輯自主。在財經界搵食之人，不可不日日讀《華爾街日報》與《金融時報》，大學經濟系、商學院嘅學生都應該日日睇。
與成班朋友熱烈討論李柱銘事件之際，一位「老崇基」突然講到：「估唔到張雄謀係共產黨員。」除咗「老崇基」之外，冇人識得張雄謀係邊一位，據講係六七十年代崇基學院化學系主任，培養不少學生成為教授、實業家、中學老師，好多學生都話張博士係一流好人，謙謙君子。
「老崇基」經常去上海，上海交通大學（江澤民母校）係名牌重點大學，戰前該校學生搞過好多反國民黨、反蔣介石政權貪腐嘅學生運動。「老崇基」在互聯網上搵到《上海交大報》內有一條《民主堡壘──戰鬥在交通大學的地下黨》摘錄，內裏講到中國共產黨努力在上海交通大學組織學生黨部，一九三八年秋至三九年成立中學綜合區委，安排學生進入交大。一九四○年，學委「又有意動員在中學已入黨的馮彥華、張雄謀二人報考交大……交大黨的力量剩下欽湘舟和新入學的馮彥華、張雄謀三名黨員，具備成立組織的條件。」
張雄謀博士在中文大學化學系退休後，早已過身，唔可以搵佢證實。令「老崇基」校友感嘆嘅，係上一輩學人（八十歲以上）可能背景十分複雜，有幾多人於四九年後不留在大陸而南來香江潛伏在大學或各階層工作嘅，外人無法得知，佢無意中發現《上海交大報》講及張雄謀教授係共產黨，令人想起昔日新亞歷史系名教授牟潤孫死後遺體放入咗北京八寶山，同樣令學生驚奇不已。